Llega a Asturies el folk nórdico de "Faerd"

El grupu danés Faerd entama güei miércoles 19 en Salón d'Actos del Antiguu Institutu de Xixón una riestra de concciertos que van llevalos a tocar per dellos locales especializaos en música folk como'l Ca Beleño d'Uviéu, onde actuen el xueves 20, el Ca Beleño de Xixón (vienres 21), el chigre - hotel "El Sabil" de Santu Adrianu, onde van ufiertar otra actuación el próximu sábadu 22 y el domingu 23, cuando van pesllar esta xira asturiana cola actuación que van dar nel chigre "El baruku" de Xixón.

La formación de Faerd ígüenla los danesos Peter Uhrbrand, col vigulín y la viola y Eskil Romme col saxu soprano y l'acordión, a los qu'hai qu'amestar al suecu Jens Ulvsand col bouzouki y la voz. Los trés faen un trabayu que recupera la música antiguo de les islles Feroe, música tradicional danesa del sieglu XVII o cantares populares de les islles Shetland. De fechu, lo más del so repertoriu vien de pieces asoleyaes nun cancioneru del 1923 que s'entitula "Melodíes de les Faroe y balaes heroiques daneses" y de los trabayos musicales de Christian Svabo, asoleyaos na segunda metada del sieglu XVIII, amás de delles composiciones propies.

Más información na so web oficial