Lleche catalana con imaxe asturiana

La Corporación Alimentaria Peñasanta, casa matriz de la Central Lechera Asturiana, inauguró la otra selmana en Cataluña la remocicada fábrica de lleche de Vidrieres (Tarragona), antigua planta de lleche RAM, inaugurada nos años 50. Capsa invirtió cerca de 23 millones d'euros en remocicar la planta, qu'agora tien capacidá pa producir hasta 200 millones de llitros de lleche que sal baxo dos marques, d'una parte la etiqueta ATO, que ye la que suel emplegar Capsa en Cataluña, pero d'otra tamién baxo la de Central Lechera Asturiana, que ye la que la empresa cuida d'asociar siempre nos sos anuncios a una imaxe idílica de vaques pastiando en praos del país baxo los cuidaos del pastor asturianu La Corporación que dirixe'l catalán Pedro Astals cuenta con facese con una plaza fuerte en Cataluña gracies a esta fábrica, una inversión que s'enxerta dientro del so oxetivu de facese cola segunda plaza nel mercáu estatal de lleche y derivaos. El diariu catalán La Vanguardia espublizaba'l día de la inauguración esti perfil laudatoriu del empresariu catalán, qu'entró n'antigua cooperativa nel añu 93, convirtiéndola nuna gran corporación, anque ello nun foi ensin que mediaren grandes conflictos derivaos de problemes llaborales y de les desinversiones del grupu n'Asturies, el más grave nel añu 2001, cuando'l pieslle de l'antigua planta de Lagisa en Xixón y la voluntá del grupu de sacar inversiones d'Asturies, como la planta de yogures, armó un espolín que llegó a la Xunta Xeneral del Principáu