Llaviana tien en marcha una campaña de promoción de la llectura col nome ‘Lleer faite llibre’

El Conceyu de Llaviana, en collaboración cola Oficina de Normalización Llingüística, punxo en marcha la campaña ‘Lleer faite llibre’. Ésta consiste na edición de seis cartelos con fragmentos d’obres lliteraries asturianes.
 
En total, son 300 cartelos que tán distribuyéndose en dellos espacios públicos y privaos del conceyu “col oxetivu de facer llegar la lliteratura a la ciudadanía”, señalen dende la Oficina de Normalización. ‘Lleer faite llibre’ ta compuesto por seis tipos de cartelos, cada ún con un testu d’autores de renome como Xuan Bello, Miguel Allende, Berta Piñán, Iris Díaz Trancho, Xuan Santori y Ovidio Parades. “La seleición de testos, que tuvo llugar nos meses precedentes, contó cola collaboración d'un grupu de maestres que desenvuelven la docencia en dellos centros educativos municipales, y nella tamién participaron responsables de la Conceyalía de Mocedá y Promoción del Asturianu, de la Oficina de Normalización Llingüística y de la Oficina d'Información a la Mocedá”, informen dende’l SNL llavianés.
 
Esta campaña de promoción de la llectura, que ta dientro del Plan Revolucionariu de la Llectura que desarrolla la Conceyalía de Mocedá y Promoción del Asturianu, aspira dar a conocer la lliteratura n’asturianu a la ciudadanía y desarrollar la capacidá crítica na población, buscando que la llectura de los testos propuestos tenga continuidá nes biblioteques y llibreríes de Llaviana. Nos meses próximos van dase a conocer otres iniciatives nesis sen.