Llaviana repartió los materiales de la campaña ‘Na igualdá nun quedes fuera xuegu’ nes escueles del conceyu

La Oficina de Normalización Llingüística del Conceyu Llaviana yá repartió los materiales de la campaña ‘Na igualdá nun quedes fuera xuegu’ ente los escolinos del conceyu. La xente interesao pue recoyelos nes biblioteques municipales.
 
Esta iniciativa, dirixida tanto a escolinos y escolines como a pas, consiste nel repartu de 1.500 folletos con información sobre xuguetes non sexistes y de 1.000 pegatines con dellos modelos nes que rebátense los roles sexistes. Asina, pue vese a una neña a la que-y presta practicar fútbol o a un neñu xugando a ser príncipe.
 
Los oxetivos de ‘Na igualdá nun quedes fuera xuegu’ son garantizar la presencia y visibilidá de la llingua asturiana n'ámbitos diversos y fomentar la tresmisión xeneracional del asturianu, amás de “concienciar a la población del conceyu de la discriminación qu’hai ente muyeres y homes y de la necesidá de crear modelos nuevos de convivencia social ente los que se puean facer relaciones d’igualdá que valoren y respeten les diferencies individuales de caúna de les persones”. D’igual forma, tamién busca  “promocionar una educación non sexista y n’igualdá d’oportunidaes” al mesmu tiempu que “sensibilizar a la población infantil y moza del conceyu sobre la importancia de la tolerancia y el respetu a la igualdá d’oportunidaes ente homes y muyeres”.
 
 Hai que destacar qu’esta campaña tamién se desarrolló n’otres zones del país, como nel conceyu de Samartín del Rei Aurelio o na Mancomunidá del Cabu Peñes, gracies al trabayu desarrolláu dende la Rede de Normalización Llingüística nos Conceyos