Llaviana entama un Concursu de Postales de Navidá pa escolinos

La Oficina de Normalización Llinguüística de Llaviana ta acabante de convocar un Concursu de Postales de Navidá pa escolinos y escolines de Primaria del conceyu. Toles tarxentes participantes van formar parte d’una esposición.
 
“Con esta iniciativa lo que se busca ye avanzar na dignificación social del asturianu nun ámbitu tán importante como l'educativu: fomentando la presencia de la llingua asturiana nel aula, impulsando la tresmisión xeneracional del asturianu y previniendo l'abandonu de la llingua materna”, espliquen dende la Oficina de Normalización, que divide’l concursu en trés categoríes: alumnáu de primeru y segundu, de terceru y cuartu, y de quintu y sestu. La meyor tarxeta de caún d’elles va llevase un premiu consistente nun llote de llibros.
 
Los escolinos y escolines que quieran participar han de presentar una postal sobre cartulina blanca tamañu A5 cola tema de la Navidá y un testu en llingua asturiana relativu. Ésta debe tar firmada pol autor, mentes que nel reversu de la mesma ha d’indicase’l nome, apellíos, cursu y centru escolar del participante. El plazu pa entregar les postales na Oficina de Normalización Llingüística de Llaviana acaba’l vienres día 2, a les 14 hores.
 
En La Pola y en Los Barreros
 
Un xuráu compuestu por Inés García Vega, responsable de la Conceyalía d'Educación, Política Cultural y Participación Ciudadana; María García Fernández, responsable de la Oficina de Normalización Llingüística; y trés persones pertenecientes a la comunidá educativa y rellacionaes cola promoción de la llingua asturiana, van ser los encargaos d’escoyer a los trés ganadores del concursu. El 19 d’avientu va tener llugar la entrega de premios na Casa Cultura coincidiendo cola inauguración de la esposición de postales participantes que tamién va poder vese na Biblioteca de Los Barreros. Hai que destacar qu’esta iniciativa tien el sofitu de la Conseyería de Cultura y Deporte y de l’Academia de la Llingua Asturiana.