Llastres va protagonizar un proyeutu pilotu pa la creación d'una marca de calidá territorial pa les villes de la mariña

La Conseyería d'Infraestructures, Ordenación del Territoriu y Mediu Ambiente estudia la creación d'una marca de calidá pa les villes de la mariña asturiana que cumplan una serie de requerimientos tocantes a dotaciones y servicios. Llastres va protagonizar ún de los dos proyeutos pilotos previstos.

Na so so comparecencia énte la Comisión d'Infraestructures de la Xunta Xeneral, na que s'abordó la ellaboración d'un plan direutor pa Llastres, la conseyera Belén Fernández manifestó que la llocalidá cuenta con tolos ingredientes pa convertise nun referente singular y un exemplu del camín a la escelencia que'l Gobiernu aspira a llograr pal conxuntu de les villes costeres. Precisó que les directrices nacionales d'ordenación del territoriu, nes que trabaya'l so departamentu na so revisión, apuesten pola xestión integrada d'esti tipu de villes, de la que reconocen la Estratexa Integrada de Xestión Portuaria de la Mariña d'Asturies (EIGPMA) como'l marcu afayadizu pa facela.

La titular d'Ordenación del Territoriu apuntó a la posibilidá de realizar dos proyeutos pilotu como ensayu pa la definición de la marca y el métodu a siguir pa llogral, ún d'ellos en Llastres, que cuenta cola distinción de Bien d'Interés Cultural como conxuntu históricu y foi Pueblu Exemplar d'Asturies, qu'incluyiría, ente otres, propuestes pa desaniciar los sos problemes de tráficu, y otru nuna villa de la mariña occidental entá ensin decidir. A partir de los resultaos del trabayu previu, ellaboraríase un plan especial de les villes mariniegues que sirviría de fueya ruta pal futuru.

“Queremos y tenemos d'actuar dende la premisa de la cooperación colos conceyos, respetando la so autonomía; hemos facelo d'una manera venceyada a les competencies en territoriu mariniegu y la so xestión integrada, que son les nuestres. Y tenemos que facelo non de manera aisllada, pa una sola villa d'un solu conceyu, sinón de forma más xeneralista, pensando nel conxuntu de les villes de la mariña”, señaló la conseyera. La marca de calidá llevaría implícita la ellaboración d'un catálogu de los servicios esistentes nes villes asturianes, de les necesidaes pendientes y de les propuestes p'atendeles, lo mesmo que d’otros aspectos rellacionaos colos sectores d'actividá, el funcionamientu y la vida nestes llocalidaes.