Llaranes, salida cabera d'esta edición de CaleyAvilés

Los participantes van poder conocer con detalle esti barriu avilesín venceyáu a ENSIDESA nuna visita guiada n'asturianu.

El llunes viniente, día 21, ye cuando ta programada esta salida per Llaranes a les 18 hores. El sitiu d'alcuentru va ser la ilesia Santa Bárbola d'esti pobláu construyíu a mediaos del sieglu pasáu p'acoyer a trabayadores de la siderurxa avilesina.

La participación na visita guaida ye de baldre, pero hai qu'acutar plaza contautando cola Estaya de la Llingua d'Avilés nel númberu de teléfono 985.54.55.08 o nel corréu electrónicu estayallingua@ayto-aviles.es, yá que'l númberu de places ta llendáu a 25 en cada salida. La de Llaranes ye la cabera de les seis programaes en cinco xornaes na que los asistentes pudieron conocer en llingua asturiana, coles indicaciones del guía oficial Denis Soria, el cascu históricu en dos ocasiones, el Muséu d'Historia Urbana d'Avilés, el Parque Ferrera y el Parque La Madalena.