Llangréu recupera’l so festival de cerveza artesano cola presencia de Los Berrones y La Tarrancha

Llueu d’un parón obligáu de dos años pola pandemia, torna esta fin de selmana’l Festival Internacional de Cerveza Artesano de Llangréu (FICAL). Marisa Valle Roso va lleer el pregón d’esta folixa na que la música tien un papel importante, con presencia de bandes como Los Berrones, La Tarrancha, Ilustres Patilludos, los gallegos Dakidarría y Triángulo de Amor Bizarro o los andaluces La URSS.

Los Xardinos de la Pinacoteca Eduardo Úrculo, en La Felguera, van acoyer los puestinos de cerveza artesano, les furgonetes de comida y l’escenariu onde van desendolcase les munches actuaciones programaes del vienres al domingu con entrada de baldre. La inauguración va ser mañana a les 18 hores cola Banda Gaites Conceyu de Llangréu y Gaiteros del Carbón, pa media hora depués producise la llectura del pregón por parte de Valle Roso.

Los conciertos van principiar a les 20 hores con Automatic Kafka, pa siguir con Varón y Los Dandies (21 hores), Ilustres Patilludos (22 hores), Los Berrones (23 hores), Dakidarría (00.45 hores) y La Tarrancha (2 hores). El sábadu, mentes, van tocar Urrechu Meana y Los Chicos Malos (20 hores), Supermirafiori (21 hores), Viuda (22.30 hores), Yawners (23.30 hores), Triángulo de Amor Bizarro (00.30 hores) y La URSS (2 hores).

El domingu, a les 17 hores, va poner la música Merucu. La programación de FICAL complétase con delles charres, cursos o prebes de cerveza.

Productores participantes

Nesta edición de FICAL van tar presentes 18 productores con diferentes variedaes. Son Uiltje, Saltus, La Grúa, Península, Thornbridge, D'Equí, Sanfrutos, Asturias Brewing Company, Garage, Dai, Caleya, Redneck, La Pirata, The Garden Brewery, Naparbier, Castreña, Laugar y Dougall's.

Na semeya, un momentu de la edición del 2018 del FICAL.