Llangréu acueye l’espectáculu “l’Asturianada, cantares y musica d’un país”

A les 20.15 hores del vienres 4 de mayu, el Nuevu Teatru La Felguera va acoyer l'espectáculu "L'Asturianada: cantares y música d'un país" que val como presentación pal llibru "La Asturianá: de la magia a la desolación", obra del escritor y estudiosu de l'Asturianá Oscar Roces Arboleya. L'actu nun va ser solo una presentación al usu, sinón que va más allá y conviértese nun espectáculu variáu nel que se combinen cine, canción y poesía.

La presentación del actu va correr a cargu de dos figures relevantes de la cultura asturiana, Gabino Busto Hevia y Pablo Rodríguez Medina, la canción y la música asturiana van ponela intérpretes del altor de Bibiana Sánchez García, Héctor Braga, Valentín Fuentes y Francisco José Fernández Fernández.

Na obra "La Asturianá: de la magia a la desolación", d'Oscar Roces Arboleya (La Texuca, Bimenes, 1963) presenta un ensayu fondu y estensu, que dacuando ye polémicu por esponer idees tresguesores y novedoses, pero siempre dende'l rigor y con argumentaciones de pesu.

"L'Asturianá: De la Magia a la desolación. Un siglo de canción asturiana", ye un estudiu sobre l'Asturianá escritu en clave histórico-social y mui comprometíu, nel que'l so autor trata de facer homenax a la canción como ún de los heriedos de mayor importancia que nos llega de los nuestros antepasaos y como mediu de comunicación y espresión de la realidá socio-cultural asturiana.

En "Dende la maxa a la desolación", Oscar Roces, con rigor y espíritu críticu, analiza y interpreta'l pasáu y el presente de l'Asturianá pa rematar definiendo'l so futuru como mui poco esperanzador pol devenir de la propia sociedá asturiana y pola falta d'escuela, causes que torguen tou tipu d'esperanza pa esti xéneru y falen d'un momentu de desolación nel que se fai necesario una intervención que posibilite la involución d'esta situación. En definitiva un interesantísimu ensayu sobre l'Asturianá qu'aporta munches idees novedoses y analiza'l xéneru ensin prexuicios, con gran compromisu y munchu rigor, rematando nuna visión xeneral qu'avanza claves definitories de la identidá cultural del pueblu asturianu.

Esta presentación en La Felguera vien a rematar una riestra presentaciones feches nel últimu añu per toa Asturies: en L'Entregu, Uviéu, Xixón, Grao y La Pola Siero. L'autor del llibru va centrase nesta ocasión no que ye la tresmisión oral d'esti gran tesoru cultural asturianu, afondando tamién na figura de dellos interpretes llangreanos.