Llangréu vivió la presentación d’un documental dedicáu a la vida de Xuacu Amieva

‘Xuacu Amieva, onde l’agua ñaz’ ye’l nome d’un documental de 40 minutos de duración dedicáu a la trayeutoria del gaiteru asturianu. Esta obra ye iniciativa d’alumnos y alumnes del CIFP CISLAN y presentóse’l llunes nel Cine Felgueroso de Sama.
 
El trabayu, grabáu en dellos conceyos asturianos, percuerre la trayeutoria de Xuacu Amieva dende los años 80 descubriendo canciones y paisaxes gracies a la intervención de xente tan conocío nel mundu musical como Carlos Núñez, José Manuel Tejedor, Fred Morrison, Alberto Fernández Velasco, Lisardo Lombardía o Ḷḷumerinos de Ḷḷumés. Na presentación nel Cine Felgueroso de Sama nun faltó a la cita’l gaiteru y multiinstrumentista d’El Mazucu, amás d’Esther Díaz, alcaldesa de Llangréu; y Ricardo Alonso, encargáu de la producción de la cinta.
 
Esti documental dedicáu al llabor musical d’Amieva ye obra de los alumnos y alumnes de los cursos d’Operador de cámara y de Téunicu de soníu del Centru Integráu de Formación Profesional de Comunicación Imaxe y Soníu de Llangréu (CIFP CISLAN). Nél tamién collaboraron dellos conceyos asturianos y Tumismocine.