Llanes preparase pa una edición nueva de la Folixa del Tardíu

Llanes al Cubo vuelve a a reclamar l'atención de tol mundu, trés díes de conciertos, esposiciones, proyecciones y demás cuestiones rellacionaes cola industria cultural asturiana son el cebu p'averase hasta'l conceyu llaniscu el fin de selmana del 28 d'ochobre.

Llanes al Cubo yá ye una referencia como iniciativa cultural n'Asturies y fuera d'ella. Depués de varios años d'apueste continuáu por parte'l del Conceyu de Llanes, llegóse al resultáu que yera d'esperar. Un festival afitáu nel tiempu, espaciu y públicu, que supo edición tres edición dir afitando les señes d'identidá del mesmu, a la vez que remocicaba o amestaba elementos al festival pa dir meyorando'l productu que podemos ver por exemplu esti añu. Esa tresformación fai qu'en Llanes al Cubo podamos disfrutar d'un riestra de conciertos de muncha calidá, los más d'ellos venceyaos al mundu del folk, pero onde tamién hai espaciu pa otros estilos que fai que medren les posibilidaes d'éxitu de Llanes al Cubo. Amás de la música en directo, esposiciones, proyecciones de cortos, teatru o presentaciones de llibros igüen ensin dubia un programa pal fin selmana del 28 al 30 d'ochobre pa nun escaecer.

Como atractivos más importantes de Llanes al Cubo de 2005 tán primero de nada la nómina de grupos que van actuar nos escenarios del festival. Folk asturianu, pero tamién d'otros países van ser el reclamu principal d'estos trés díes. Ello ye que pa entamar el vienres día 28 a les 20:30 na carpa B tenemos a Manuel Luna, el conocíu y veteranu folclorista lleva décades trabayando na investigación del la tradición cántabra y castellana, qu'espeyó en diez discos na so carrera musical. Pela nueche a les 22:00 hores -na carpa A- únense trés nomes con un currículum bien llargu y importante del folk européu. Per un llau dende galicia llega la cantante Mercedes Peón y la so banda, d'Asturies vamos poder ver a Llan de Cubel y pesllando'l tríu los irlandeses Lunasa, a los que paga la pena dir a ver depués del so conciertu na nueche folk de Soto d'Ayer.

El sábadu la música yá entama a sonar dende les 19:30 hores na carpa B col grupu asturianu La Bandina'l Tombo. A les 20:30 va ser el turnu de Mestura, grupu de pandereteiras gallegu. Nel platu fuerte de la nueche del sábadu vamos topanos tamién con trés grupos que, neto que la nueche del vienres, vienen de distintes llugares. Per un llau tenemos a Le vent du nord, banda de folk que vien dende'l Quebec (Canada) con un estilu y directu que quier recordar a La Bottine Souriant. Dende Galicia va actuar tamién el gaiteru Carlos Núñez, ún de los nomes más importantes nel folk internacional y qu'amuesa en cada conciertu la calidá técnica que tien nos deos cuando toca la gaita. El toque dende Asturies va ponelu Corquiéu, que toca cerca casa onde son bien conocíos los cantares de Salia.

El domingu la cuestión musical fáise muncho más variada, yá que Llanes al Cuco decidió va unos años, qu'amás del folk, que'l festival dedicara cada añu un día a otru estilu musical, nel Llanes al Cubo d'anguaño tocó-y al rock. Ello ye que de tarde, a les 18:00 hores, inda va tocar un grupu de folk, los cántabros L'Arca de los sueños, pero de magar suenen les 19:00 hores el rock manda en Llanes. Trinchera y Imposibles van tocar na carpa B del festival. A les 22:00 hores, y yá nel escenariu grande la carpa A, los andaluces Delinqüentes, la banda de pop rock Pereza y los asturianos Mala Reputación van ser los encargaos de pesllar Llanes al Cubo.

El programa de Llanes al Cubo ye muncho más ampliu, y pa conocelu meyor convidamos a visitar la páxina web del Festival onde vien tola información necesaria. Con too y con ello, Asturies.com va esmigayar el programa nos próximos díes pa que los nuesos llectores nun pierdan detalle de La Folixa del tardíu en Llanes.