Llanes al Cubo, más que música

Mañana entama'l Festival Llanes al Cubo. Amás de les actuaciones musicales ente les que rescamplen Lunasa, Llan de Cubel o Carlos Núñez, la Folixa del Tardíu tien bien d'argumentos que llamen a dir a Llanes esti fin de selmana
.

Una esposición sobre los 100 años de la llegada del ferrocarril a Llanes, la esposición de semeyes "Llanes rojo y verde" del asturianu Carlos Suárez o la presentación de la última película del director Gonzalo Suárez, que tien usao bien de veces Llanes como escenariu de les sos películes, son delles de les actividaes complementaries a la folixa llanisca, na que les espresiones más de recién de la cultura asturiana na lingua del país tamién van tener un güecu coles proyecciones de los documentales de la serie "Cinco poemes" o les de curtios asturianos. La poetisa Berta Piñán va acudir tamién a la Folixa del Tardíu pa presentar la so última obra "Noches de incendio" mientres qu'a lo llargo de tol fin de selmana va funcionar una feria d'artesanía y del llibru, discu y cine n'asturianu.