Llan de Cubel y los escoceses MacLeod! van actuar na foguera de San Xuan de Nava

Nel marcu de les III Xornaes de Música Tradicional de Nava que se van desendolcar los díes 19, 20 y 23 de xunu.

Una charra sobre l’asturianada, conciertos y actuaciones van celebrase na villa naveta mientres lo dos primeros díes, pa finar col III Festival de Bandes de Gaites LaKadarma y una Nueche Folk na foguera de San Xuan con Llan de Cubel y MacLeod!.

Tres tener llugar n’ochobre na edición última, el Conceyu de Nava decidió adelantar a xunu esta iniciativa y facela coincidir cola foguera de San Xuan llocal pa potenciar dambes actividaes. Asina, el vienres previu al 23 de xunu van inaugurase les xornaes a les 18 hores nel Muséu de la Sidra cola charra ‘L’asturianada: pasáu, presente y futuru’, na que van participar Fernando Entrialgo, Mariluz Cristóbal, Francisco Gómez López y Héctor Braga, cola moderación de Rodrigo Fernández Joglar. Yá de sábadu,  a les 17 hores, la plaza Manuel Uría va acoyer una amuesa de baille asturianu a cargu del Grupu Folclóricu La Flor del Pumar, pa continuar na plaza Pepe ‘El turráu’ cola performance ‘Soplu de vida’ de los artistes llocales Carmen Montes y Maximiliano Francisco. Pa zarrar la xornada, va celebrase una Nueche Folk con Borja Baragaño, El Koku la Manzana y los lleoneses Tarna na plaza Manuel Uría dende les 22.30 hores.

El III Festival de Bandes de Gaites LaKadarma va abrir l’actividá pa San Xuan. A les 19 hores, tamién na plaza Manuel Uría, van actuar la Banda de Gaites El Gumial (Ayer), la Banda de Gaites Castrillón y la Banda de Gaites Noega (Xixón), amás de l’agrupación llocal. Yá de nueche, a les 22.30 hores, van animar l’ambiente enantes del prendíu de la foguera los escoceses MacLeod!, formación liderada por Iain MacLeod (mandolina y voz) y que completen Ewen Henderson (violín, gaita y voz) y Mike Bryan (guitarra y voz). Pa poner el ramu, Llan de Cubel va ufrir un conciertu especial nel que van participar munchos de los amigos fechos mientres los más de 30 años d’escenarios d’esti históricu grupu folk.