Llan de Cubel, Hevia y Tuenda, nel programa oficial del XLIII Festival Interceltique de Lorient

La selmana pasada diose a conocer el programa oficial del XLIII Festival Interceltique de Lorient, edición que va tar dedicada a Asturies. Llan de Cubel, Hevia, Tuenda o Aire van ser dalgunos de los representantes asturianos en Breizh.

Del 2 al 11 d’agostu, An Oriant –nome en bretón de la población– va convertise nuna pequeña Asturies. Una bona cantidá de bandes y artistes asturianos van desplazase a Breihz pa presentar nel festival énte l’animosu públicu bretón les sos propuestes musicales de calidá. Na nueche d’apertura d’Asturies, el sábadu día 3 nel Grand Théâtre (21 hores), Aire, Herbamora y Tuenda van ser los primeros en llevar los sones del país al Interceltique, anque enantes va tener llugar ún de los momentos más esperaos del festival: el Troféu Mc Crimmon pa solistes de gaita (15 hores, Palais des Congrès). Tamién el sábadu, van principiar nel Stade du Moustoir, campu de fútbol del Lorient, les Nueches Intercéltiques –que van allargase hasta’l xueves, con un descansu’l llunes–, con representación asturiana.

El domingu va ser el turnu de la siempre espectacular Grande Parade des Nations Celtes (10 hores) y, el llunes, de la Grande Nuit des Asturies, nel Espace Marine (22 hores), escenariu principal del festival, onde se van xuntar Hevia y el so tríu, la Banda Gaites Llariegu presentando’l so ‘Llariegu 100% directo’, y Tuenda. La participación del país el martes va tar protagonizada pol grupu de baille Xeitu, que va compartir escenariu nel Espace Marine (14.30 hores) colos irlandeses De la Salle PB y los escoceses Methil Pipe Band, y por Héctor Braga, que va actuar na ilesia Saint Louis (21.30 hores) nun conciertu de música sacra, eventu nel que tamién va tar presente’l coru manés Caarjyn Cooidjagh.

El miércoles va tener llugar quiciabes ún de los conciertos más esperaos d’esta edición del festival, yá que nel Espace Marine (22 hores) van actuar los escoceses Capercaillie, que celebran el so 30 aniversariu, xunto con Llan de Cubel, banda que retorna a An Oriant ocho años depués de la so participación última nel Interceltique. La Banda Gaites Llacín, pela so parte, va compartir escenariu’l xueves nel Espace Marine (14.30 hores) colos galeses Avec Cor Meibion Cwmbach, mentes que pela nueche, na Quai de la Bretagne (22 hores) van ufrir un conciertu de baldre Skama la Rede, los escoceses CherryGrove y los córnicos Dalla. Va zarrar la participación asturiana nel XLIII Festival Interceltique de Lorient, Xeitu con una actuación nel Espace Marine (14.30 hores) xunto con los escoceses Keltica Highland Dancers, los córnicos Kemysk y los irlandeses Rinceroi Cois Laoi.