Llamazares utiliza l’asturianu pa rexistrar cuatro entrugues sobre la especialidá docente

El diputáu d’IX, Gaspar Llamazares, presentó a la Mesa del Congresu cuatru entrugues n’asturianu y castellanu per primer vegada na historia. Nelles reclama al Ministeriu d’Educación que se pronuncie sobre la especialidá docente.

Asina, l’ex coordinador xeneral d’IX a nivel estatal recuerda a José Ignacio Wert que la esistencia d’una especialidá docente de Llingua Asturiana ye una demanda de “práuticamente tola comunidá educativa, del parllamentu asturianu, de la Xunta de Personal Docente Non Universitaria del Principáu y hasta del Conseyu Escolar del Estáu". Llamazares tamién entruga pol nivel de conocimientu que tien el Ministeriu d'Educación de la realidá educativa de la “Llingua Asturiana", asina como polo que "tien pensao facer, dende'l puntu de vista políticu y de regulación alministrativa, pa facer efeutiva esta demanda". A lo último, pregunta al ministeriu si consideró les ventayes educatives, curriculares y de planificación que representa pa la educación n'Asturies la reconocencia "d'esta especialidá docente".

Enantes, la entruga del diputáu asturianu acompañóse d’una esposición estensa na qu'esplica que l’asturianu  "ye un área d'enseñanza-deprendimientu curricular dafechu, contemplada na ordenación del sistema educativu n'Asturies, y que tien una implantación bien xeneralizada, pese al so calter voluntariu, nos centros públicos d'Educación Primaria y Secundaria”. Calcó amás nel so "carácter regláu" nos estudios universitarios, col Minor nos graos de Filoloxía, la Mención nel Grau de Maestru en Primaria y la Especialidá d'Asturianos nel Máster de Formación del Profesoráu de Secundaria.

Asina, señaló los "problemes organizativos, económicos y funcionales graves pa la enseñanza del asturianu y una desigualdá de tratu evidente al so profesoráu que,  por cuenta del so provisionalidá, nun pue exercer les sos funciones nes mesmes condiciones que'l restu de docentes d'otres especialidaes", precisamente pola ausencia de la especialidá.