Llamazares reclama llexitimar caldía l'autogobiernu d'Asturies, un estatutu de tercera xeneración y la reforma electoral

El voceru d'IX na Xunta refuga llínees coloraes y considera necesariu aprobar un presupuestu social, d'esquierdes, que termine col únicu aprobáu pol PP n'Asturies.

Gaspar Llamazares, voceru parlamentariu d'IX na Xunta Xeneral, recordó ayeri que'l plenu institucional del Día d'Asturies dase en circunstancies especiales, non solo pol aniversariu de la monarquía asturiana, sinón por ser plenu hestóricu que tien que ver col aniversariu de la Constitución española, que ye l'orixe del Estatutu d'Autonomía d'Asturies y del autogobiernu d'Asturies. Nesti sentíu, Llamazares demandó llexitimar acaldía l'autogobiernu d'Asturies cuando nestos momentos hai quien se van del autogobiernu a l'autodeterminación, un “escapismu como otru cualesquiera”, hai quien vuelven al centralismu buscando lo que “pudo ser y nun foi” y los que se queden namá na inercia del desenvolvimientu del estatutu d'autonomía, ensin más. IX, dixo, quier un desenvolvimientu del estáu federal y de los estatutos d'autogobiernu, en concretu l'Estatutu d'Autonomía d'Asturies que tien de pasar la reválida, que nun pasó xuntu con otros estatutos. “Somos de los estatutos de primera xeneración y non de los de tercer xeneración”, reclamó Llamazares. A xuiciu de Llamazares n'Asturies ye “imprescindible” realizar una reforma electoral, porque va ser una de les poques autonomíes con trés circunscripciones, en desterciu de la proporcionalidá y Asturies tien de llevar a cabo iniciatives pa ameyorar el financiamientu autonómicu, modificando'l sistema de financiamientu y non solo ameyorando los servicios públicos, como dixo güei Pedro Sánchez. “Tienen de financiase los servicios públicos ya impulsar la solidaridá de los ciudadanos nesti país”, alvirtió.

La otra asignatura que queda na Cámara asturiana sigue siendo'l diálogu y l'alcuerdu, repitió la selmana de la celebración del Día d'Asturies. Al so xuiciu nun puede faese un añu electoral y una campaña de 2019 col presupuestu del PP, "porque nun se correspuende cola mayoría de la cámara nin coles necesidaes de la esquierda”. Al igual que güei'l PSOE y Podemos estatal defenden que'l puntu d'inflexón d'esta llexislatura ye un presupuestu d'esquierdes, social, para'l próximu añu, IX d'Asturies defende la coherencia de que n'Asturies haya un presupuestu social para 2019. El grupu parlamentariu va dedicar los sos esfuerzos a esti oxetivu y a los ámbitos d'alcuerdu en materia fiscal, de servicios públicos o educativos, anunció.

Sobro les "llínees coloraes” que plantega Podemos nel cero trés, gratuitu y universal que'l voceru del PSOE na Xunta Xeneral considera “invidable”, Llamazares sostuvo que “nós somos coloraos, nun tenemos necesidá de poner llínees coloraes pa manifestanos” y abogó por una posición d'esquierdes pa un "presupuestu social”, viendo con “qué recursos cuntamos, evalualos y ver les prioridaes sociales que tenemos, que nun son obsesives nin monolítiques”. IX, esplicó, tien prioridaes sociales y ente elles ta la estensión ya integración del cero a trés, pero tamién el Plan de Ciencia, la meyora de l'atención primaria sanitaria o la meyora de la garantía de los servicios públicos o la garantía de los servicios sociales. Una serie d'espacios que fueron oxetu de diálogu, negociación y alcuerdu ente les fuerces polítiques d'esquierdes que, de la mesma, tienen d'afigurase nesti postreru presupuestu, ensin que nengún finxu xustifique'l caltenimientu d'un presupuestu d'orientación conservadora apautáu pol PP. Les posiciones de principios deben llugar a una negociación flexible pa dar respuesta a les esmoliciones y necesidaes de los asturianos d'empléu, educatives, sociales, sanitaries…. , remachó Llamazares. El voceru d'IX aseguró tener “la mayor disponibilidad pa la negociación y l'alcuerdu. Nun precisamos a la fin de llexislatura faer nengún xestu especial que nos caracterice, nós siempres nos caracterizó pol diálogu, la negociación y l'alcuerdu d'esquierdes y vamos siguir perhí”, concluyó les declaraciones tres la Xunta de Voceros.

Semeya: Gaspar Llamazanes na Xunta Xeneral