Llamazares llama a ser responsables "nun momentu decisivu p'algamar la oficialidá"

|
Gaspar Llamazares y grupu d'IX na Xunta Xeneral

"Los grupos políticos asturianos lo que tenemos que facer ye tresformar la opinión de los asturianos n'opinión llegal", alvirtió'l voceru d'IX na Xunta Xeneral.

Tres la celebración de sesión de la Comisión Especial d’Estudiu sobre'l Réxime de Proteición y Promoción del Asturianu, Gaspar Llamazares fixo un llamamientu al restu de partíos p'avanzar hacia la oficialidá del idioma. "Llegó un momentu decisivu p'algamala y, polo tanto, les fuercies polítiques nun pueden evitar la so responsabilidá". En referencia a Podemos, que ayeri faló de una cooficialidá a la valenciana, el voceru señaló que “nun sé si a la valenciana, a la murciana, a l'andaluza..., pero creo qu'a l'asturiana, ensin dulda”.

Llamazares calcó en que "tamos en condiciones de que lo pasa na cai, ocurra tamién nes lleis. La mayor parte de los asturianos quieren la oficialidá, y los grupos políticos parllamentarios lo que tenemos que facer ye tresformar lo qu'opinen los asturianos na opinión llegal, primero nel Parllamentu y llueu na reforma estatutaria". Sobre la diferente postura del PP con respeuto a les llingües propies d'otros territorios, apuntó qu'espera que los distintos partíos depués de ver los resultaos de les encuestes sociollingüístiques "sepan lleer la opinión de los ciudadanos, que quieren la oficialidá, dalgo que nada tien que ver cola reforma de la Constitución nin con Catalunya. Nada. Tien que ver con una demanda que ta práuticamente pendiente dende la ellaboración del Estatutu", concluyó.

Contador Estadistiques