Llamazares dimite como diputáu y refuga dir a les primaries d'IX

Comunicólo vía carta a Ramón Argüelles, coordinador xeneral de la coalición.

Gaspar Llamazares abandona'l so escañu na Xunta Xeneral, onde yera voceru d'Izquierda Xunida (IX). Tamién refuga presentase a les primaries pa la formación de la llista de cara a les eleiciones de mayu, onde la organización va dir en coalición con Izquierda Asturiana (IAS), pa "nun mermar les merecíes espeutatives eleutorales d'IX".

El yá ex diputáu da asina un pasu a un llau depués de la polémica que protagoniza cola direición xeneral estatal d'IX depués de que'l partíu del que ye promotor, Actúa, anunciara la so decisión de presentase a les eleiciones de mayu. Esta situación desendolcó na apertura d'un espediente a Llamazares y a otros militantes d'Izquierda Abierta, formación integrada na coalición a la que tamién pertenez el políticu d'orixe rioxanu, por incumplir los estatutos d'IX, lo que provocó un alderique intensu nel país qu'atrayó la solombra d'una posible intervención por parte de Madrid y el cuestionamientu de la autonomía d'IX d'Asturies

Son estes circunstancias "les que me lleven, non ensin tristura, a apartame de manera definitiva de les primaries próximes asina como a arrenunciar a la portavocía y al acta de diputáu, yá que de non facelo podría poner a los pies de los caballos a la histórica organización de la izquierda d'Asturies, dalgo que nun me perdonaría", esplica na carta Llamazares. El so escañu va ocupalu Jaime Gareth Flórez, ex alcalde de Degaña, mientres que foi Concha Masa la qu'acudió esta mañana a la Xunta de Voceros na Xunta Xeneral.

Na semeya, Llamazares na marcha contra'l pieslle d'Alcoa del día 12.