Llamazares critica que se pretenda convertir la Xunta Xeneral nun “parllamentu cautivu de la dinámica estatal"

La suspensión del Plenu del vienres na Xunta Xeneral pola sesión d'investidura a propuesta de la FSA-PSOE, gracies al apoyu del PP, Foro y Ciudadanos, indigna a IX. Gaspar Llamazares, qu’anuncia que’l so partíu pasa a la oposición, critica que se pretenda que’l parllamentu asturianu sía “cautivu de la dinámica estatal”.

“Yá nos paez mal que’l presidente del Principáu nun sía quien a compatibilizar el so llabor de dar cuentes énte la Cámara col so llabor a nivel del Estáu col Partíu Socialista, como pa qu’aceptemos fácilmente suspender l’actividá parllamentaria’l vienres”, apunta’l voceru d’Izquierda Xunida (IX) na Cámara, que considera “comprensible que pueda tar ausente el presidente, pero non que los diputaos del grupu parllamentariu socialista abandonen el Frente Norte pa sumase a la guerra del sur”. Podemos Asturies tamién amosó’l so malestar por esta situación causada pol fechu de que dellos parllamentarios socialistes nun van poder tar presentes el vienres n’Uviéu “por compromisos derivaos de la sesión d’investidura” del Gobiernu estatal, según comentó’l voceru de la FSA, Fernando Lastra.

Na so intervención, tres la xunta de voceros, Llamazares tamién anunció que la so formación pasa “de una posición de collaboración a una posición d’oposición” col Gobiernu socialista de Javier Fernández. L’astención decidida ayeri pol Comité Federal na investidura de Mariano Rajoy como presidente del Estáu “afeuta a la collaboración y la confianza ente los dos grupos parllamentarios, porque afeuta a ún de los pilares fundamentales del alcuerdu: la posición d’Asturies y del so Gobiernu énte’l Gobiernu central en temes tan importantes como la minería, los servicios públicos y les infraestructures”.

Llamazares nun descarta “alcuerdos puntuales ente les dos fuercies, pero como digo, d’una posición anterior de collaboración alredor de l’axenda d’investidura, pasamos a una oposición esixente al Gobiernu pa que cumpla con Asturies”. Con respeuto a los términos del alcuerdu d’investidura, será “esta direición y la próxima d’Izquierda Xunida la que decidirá cuál ye’l so futuru”.