Llamazares comprométese a facer que “salga alantre” la reconocencia de la especialidá d’asturianu

El candidatu d’IX al Congresu por Asturies, Gaspar Llamazares, comprometióse a facer que “salga alantre” la reconocencia de la especialidá docente de Llingua Asturiana. El cabezaleru de la coalición aconceyó esti xueves con Ana María Cano.
 
Nel alcuentru tamién tuvieron presentes Esther Díaz, candidata al Senáu d’Izquierda Xunida (IX) y académica, y Roberto González Quevedu, secretariu de l’Academia de la Llingua Asturiana (ALLA). Na rueda de prensa posterior, Llamazares fixo referencia a la "situación de discriminación" que sufren los profesores d'asturianu, n'interinidá, polo que amosó'l compromisu de la so coalición de “concretar esta especialidá” al envís de que puedan convocase oposiciones de profesor d'asturianu, dalgo que depende del Executivu estatal.
 
D’igual forma, comprometióse a presionar dende'l grupu políticu d'IX nel Congresu pa que se modifique l'Estatutu d'Autonomía cola aprobación de la cooficialidá de la llingua asturiana. Nesti asuntu reconoció que "la reforma estatutaria nun ye una prioridá" pa les trés principales fuerces polítiques asturianu pero "vamos ver cómo evoluciona" la llexislatura. Amás, señaló que mientres nun se llogre la oficialidá, "hai un camín por percorrer col espliegue de la Llei de Promoción y Usu".
 
Pela so parte, la presidenta de l’ALLA señaló que pese a que la política llingüística correspuende al Gobiernu nacional, hai cuestiones que dependen del estatal, como ye'l casu de la reconocencia de la especialidá, "que tien una solución fácil al marxe de la oficialidá". Entrugada sobre’l Plan de Normalización Llingüística qu’anunció’l conseyeru de Cultura y Deportea a últimos de setiembre, Cano aseguró desconocer los planes d’Emilio Marcos Vallaure y, al respeutu del cumplimientu de la Llei d’Usu, consideró “lóxico que quien mos gobiernen cumplan les lleis”.
 
Por último, González, qu’exerció como profesora d'asturianu, recordó que tol profesoráu de Llingua Asturiana "ta en precario" y resaltó que namás falta la especialidá porque "la formación yá la tenemos".