Llamazares anuncia que va usar l’asturianu nel Congresu pa entrugar sobre la especialidá docente

Gaspar Llamazares celebró esti xueves una xunta colos responsables de l’Academia de la Llingua Asturiana. Tres l’alcuentru, el diputáu d'IX anunció que va usar l’idioma del país nel Congresu pa entrugar sobre la especialidá d’asturianu.

Según esplicó, va formular una batería d'entrugues na Comisión d'Educación de la Cámara Baxa sobre la reconocencia de la especialidá docente de Llingua Asturiana, encamentada pol Conseyu Escolar del Estáu al Ministeriu d'Educación, pa lo que va utilizar tanto’l castellanu como l'asturianu. El diputáu d'Izquieda Xunida (IX) firma que, con esta aición, busca tamién "la normalización y visibilidá del asturianu nel Congresu de los Diputaos”. Recordó que nestos momentos, hai "264 profesores en primaria y secundaria que tienen la especialidá y la formación, bien la mención pa Primaria o'l máster pa la Secundaria, y nun tienen la reconocencia d'especialidá docente que depende del Ministeriu d'Educación".

Nesti puntu comentó que'l Conseyu Escolar encamentó esti reconocimientu al Gobiernu nel 2008 y, dende entós, nada se supo al respeuto. "Vamos preguntar al Gobiernu qué va facer con esti encamientu y pa cuándo piensa reconocer la especialidá docente n'asturianu", señaló. Sicasí, calcó na "forma" de la entruga, que va ser billingüe. Preguntáu por si'l reglamentu del Congresu prevé esta posibilidá, reconoció que non, pero tamién esplicó que ta "normalizao" que s'usen otres llingües distintes del castellanu pa formular "hasta párrafos y entrugues enteres". "Nun cabe descartar la posibilidá de que la Mesa del Congresu faiga lo mesmo que coles preguntes sobre Urdangarín (que se retiren)", señaló Llamazares, que caltién la so intención y asegura que posteriormente IX tamién va presentar una proposición nesti sen, tamién n'asturianu.

Na rueda de prensa posterior al alcuentru tuvieron presentes xunto con Llamazares, Ana María Cano, presidenta de l’Academia de la Llingua Asturiana (ALLA); la diputada d'IX-LV na Xunta Xeneral, Emilia Vázquez; y l'académicu Xosé Antón González Riaño. Na so intervención, Cano agradeció’l compromisu d'IX, que cumple asina colo espuesto nesta materia nel so programa eleutoral. Calcó amás na situación na que s'alcuentren los docentes y "la incoherencia" qu'al so xuiciu supón el fechu de qu'esista esti oficiu, pero, al mesmu tiempo, nun tea reconocíu de forma oficial.

Sobre la rebaxa del presupuestu de l'Academia, anunciada pol Gobiernu, la presidenta considera que va afeutar "sustancialmente" al llabor de la institución. Ello ye qu'afirmó que los fondos van dar xusto pa pagar la plantiya de cuatro persones, los gastos de caltenimientu y les actividaes que "nun podemos dexar de facer", esto ye, les Xornaes d'Estudiu, la Universidá de Branu y el Día de Les Lletres. Mentes, ve difícil la continuidá de los estudios, aiciones d'informatización, la presencia de becarios, les publicaciones y el restu de xeres que se desarrollen dende l'órganu. El presupuestu de l'Academia va ser esti añu de 167.900 euros, 62.000 menos que nel exerciciu anterior y asemeyáu a les cifres que manexaba la institución académica nel añu 1997.