Llaceria Rock va dar un conciertu únicu en Lluanco venti años depués del primeru de la banda

Nel branu de 1999 Llaceria Rock, formación que tuvo activa hasta'l 2002, dio’l so primer conciertu nes fiestes de Santana nel barriu altu de Lluanco. Venti años depués, la banda torna a xuntase pa dar una actuación única que va tener llugar a finales d'esti añu.

Hai unes selmanes axuntáronse los cuatro miembros que tuvieron durante tola trayectoria del grupu, que dio una ventena d’actuaciones y asoleyó una maqueta de nome ‘Yá tamos equí’ compuesta por seis cantares que tán disponibles na plataforma YouTube. D’esa xuntanza salió la idea de volver a aconceyar pa dar un conciertu en Lluanco esti mesmu añu, una cuestión ‘modesta’ onde repasar los cantares d'aquella grabación, dalgún otru compuestu y dalgunes de les versiones que facíen en direuto.

Los integrantes de Llaceria Rock son músicos con trayeutoria posterior na escena asturiana: Míguel Fernandi ‘Burilo’, cantante anguaño de Skama La Rede y con anterioridá en Xorrez; el guitarrista Rafa Ávila, tamién miembru de Xorrez y mientres una temporada en La Tarrancha, amás d'en dalgunes orquestes; el baxista Pablo Rodríguez, con pasáu en formaciones como Güerku y Polinomio; y el batería Wes Rodríguez, qu'anguaño tien carrera como solista y ye músicu de delles bandes, llegando a ser cantante d'orquestes como Dominó. Amás conviden pa esti conciertu a otros componentes que tuvieron en Llaceria Rock, como’l teclista Eneko Carrillo, el batería Alejandro de la Iglesia y el gaiteru Jimmy Blanco.

En feches próximes el grupu cuenta con dar más información sobre esta cita tan especial pa celebrar los venti años de la formación. Pa ello, y otres cuestiones, tán acabantes d’abrir un perfil na rede social Facebook.

Na semeya, primer actuación de Llaceria Rock.