L'investigador Pablo San Martín yá tien p'asoleyar la so gran obra sobre'l nacionalismu asturianu

La casa editorial Trabe tien previsto asoleyar pa últimos d'esti mes d'abril la obra "La nación (im)posible (Reflexiones sobre la ideología nacionalista asturiana)" de la que ye autor l'investigador Pablo San Martín Antuña y que s'enconta mayormente nel trabayu pa la que foi la so tesis doctoral.

La presentación del llibru introduz al nacionalismu asturianu como ún de los movimientos ideolóxicos que se reformularon dende finales de los años sesenta, d'un periodu nuevu na política española contemporánea qu'entamó cola acabación del Franquismu, un periodu de ferviella ideolóxica na que guañaron estremaes ideoloxíes qu'aspiraben a redefinir la realidá social en términos nuevos pa ocupar el güecu que diba dexar ermu l'ideariu franquista, ente ellos los nacionalismos periféricos y ente ellos l'asturianu.

Partiendo d'esta base, la obra de Pablo San Martín fai un estudiu en profundidá sobre'l movimientu nacionalista asturianu, el so surdimientu y construcción ideolóxica, la xenealoxía de los elementos discursivos asturianistes concasándolos col discursu nacionalista, y la construcción d'una narrativa histórica con esos elementos por parte del mesmu movimientu nacionalista.

A lo llargo del llibru analícense los principales fechos históricos, l'actuación de los protagonistes y los trunfos y fracasos d'esti movimientu políticu, retrucando, dende los presupuestos de les corrientes de pensamientu críticu europees, munches de les entrugues lóxiques que surden al intentar interpretar el nacionalismu asturianu, como'l saber d'au proceden los elementos inxertos nel proyectu nacionalista y la evolución del significáu de los mesmos.

Pablo San Martín Antuña (Uviéu 1974) ye Doctor en Ciencies Polítiques pola Universidá del País Vascu y profesor na universidá inglesa de Leeds. Gran estudiosu de la historia del nacionalismu asturianu, Pablo San Martín yá asoleyare va tiempu la obra "Asturianismu políticu: 1790-1936" na qu'ellabora un esquema de los elementos asturianistes presentes nel discursu políticu dende'l tiempu de Xovellanos hasta la Guerra Civil.