“L’Interceltique ye dalgo más qu’un festival; ye un nexu cultural en llinies globales”, asegura Santianes

La delegación asturiana zarró’l XLIX Festival Interceltique de Lorient con nota y yá piensa na edición próxima, la cincuentena, que va tar dedicada al país anfitrión. Asturies nun va faltar na histórica cita próxima d’un certame "corazón del mundu celta" que, apunta Iñaki Sánchez Santianes, “ye un nexu cultural en llinies globales”.

“L’eventu tien una gran magnitú”, añade’l responsable de la delegación, y les cifres nun mienten: “Pasaron pel festival 800.000 persones. Por poner una comparación, la Feria de Muestres, que dura 16 díes, seis más que l’Interceltique, raspia esa cantidá de visitantes”, espresa. Tamién hai que destacar les 75.000 persones que vieron dende les cais d’An Oriant la Grande Parade de Nations Celtes, el desfile qu’axunta a 3.500 artistes; los 7.000 que foron a les cinco Nuit Interceltique Bretagne; y los 7 conciertos qu’escosaron entraes a pesar del aforu altu de los espacios, como foi’l casu del de Goran Bregović o’l del gallegu Carlos Núñez.

Un gran escaparte nel qu’Asturies tien que tar. “Hai que facer ver a la xente que l’Interceltique ye dalgo más qu’un festival; nun ye sólo un nexu ente les cultures celtes, sinón que ye un nexu cultural en llinies globales”, asegura Santianes, que destaca la visibilidá que da “a la música, la cultura, la llingua, el turismu…”, del país.

El responsable de la delgación desconoz si la mayor sensibilidá que ta amosando’l Gobiernu d’Asturies pa cola cultura asturiana podría llevar a una potenciación de la delegación asturiana nel Festival Interceltique de Lorient, más cuando la del añu próximu, con feches del afitaes del 7 al 16 d’agostu, promete ser histórica. “Nun falamos nada entovía”, apunta Santianes, que, tres unos díes de reposu, cola llegada de setiembre, va comenzar a trabayar xunto cola organización del certame dirixíu pol asturianu Lisardo Lombardía nuna edición próxima “que va ser mui potente, como la ocasión lo merez”, y que va llevar el nome de ‘50 años del corazón del mundu celta”.

Un papel escelente

Cola única pena de nun poder repetir victoria per sétimu añu siguíu nel Trophée Mac Crimmon, por cuestión d’edá tres un empate ente Fernando Vázquez Cárcaba y la gallega María López Carballo, tornó la delegación asturiana d’An Oriant. “El balance ye mui positivu. Prau Llerón y Fonte Fuécara tuvieron grandes actuaciones, L-R dieron un conciertu brutal y tuvieron una gran crítica y aceptación del públicu, y Rubén Alba y los sos músicos fixéronlo realmente bien, gustando muncho la segunda de les sos actuaciones nel Palaciu de Congreso”, resume Santianes.

A ello hai que sumar el segundu premiu de Fonte Fuécara en percusión, “poniendo en valor el tambor asturianu”, y l’esfuerciu de los lluchadores asturianos de baltu que participaron nel tornéu de gouren, la llucha tradicional bretona. La participación del maestru gaiteru Pedro Pangua y la presencia de la obra Tania Blanco nel Expoceltic Art completaron la delegación asturiana, compuesta por unes 90 persones.

Tampoco nun hai qu’escaecer el trabayu de l’Asociación Asturies Gayaspera, qu’instaló esti añu’l pabellón d’Asturies nel Interceltique, espaciu nel que la música foi protagonista, cola presencia de Silvia Quesada y Alfredo González y del grupu Stolen Notes, xunto cola gastronomía del país: “Como siempre, el chigre tuvo mui bona aceptación ente’l públicu bretón, sobre manera la fabada y la sidra, que ye un ésitu tremendu nel festival”, destaca Santianes.

Na semeya, el pabellón d'Asturies nel XLIX Festival Interceltique de Lorient.