L'Interceltique de Lorient algama'l so ecuador

|
La Laguna del Torollu y Trebeyu na Nuit Interceltique Bretagne 2016

An Oriant ta siendo estos díes un fervedoriu de xente. El Festival Interceltique algama'l so ecuador y vecinos y visitantes disfruten de la música y de les munches actividaes desendolcaes al rodiu de la cultura celta. Asturies ocupa un puestu protagonista nel certame.

Nestos primeros díes l'actividá de la delegación asturiana foi frenética. L'Interceltique nun pudo comenzar meyor, col trunfu del sábadu de Jesús Fernández nel Trophée Mac Crimmon de gaita, el segundu algamáu pol uviedín tres el del 2013. Yá de nueche, la Banda de Gaites La Laguna del Torollu y el Grupo Folklórico Trebeyu amosaron la nuesa cultura al munchu públicu que s'axunta nel Stade du Moustoir pa ver la primer de les Nuit Interceltique Bretagne, asina como na Gran Parade des Nations Celtes de la manaña del domingu.

'País Malva', de Muyeres, tamién algamó repercusión n'An Oriant cola so representación el domingu, mentes que Corquiéu actuó ayeri y repite esta nueche, a les 21.30 hores, na Quai de la Bretagne xunto colos bretones Dour Le Pottier Quartet y Tymen Kerveillant Quintet. Pa la xornada de güei tamién prevista la participación de Trebeyu dientro del ciclu Musiques et Danses des Pays Celtes, que se desendolca nel Espace Marine –l'escenariu principal del festival–, de magar les 14.30 hores, xunto colos irlandeses Ballingeary Pipe Band y Planxty O Rourke.

D'igual forma, el chigre d'Asturies torna a ser el favoritu ente la xente que s'avera al Interceltique ente los puestos de les naciones participantes instalaes na Quai des Pays Celtes. La nuesa gastronomía y, sobre manera, la sidra asturiana son los principales atractivos, ensin escaecer l'ambiente que se vive nél.

Restu de díes

Nos díes que queda de festival, la participación asturiana más destacada va tar na Nuit Interceltique Bretagne (güei, mañana y el xueves). Mentes, la Laguna del Torollu va actuar mañana nel Espace Marine a les 14.30 hores xunto colos córnicos Bolingey Troy, los neozelandeses The Highland Dance Company y los escoceses Winnipeg Police Pipe Band.   

L'acordionista Marcos García va intervenir el vienres, primero nuna clase máxistral d'acordión  a les 10 hores nel Palais des Congrès, xunto colo los bretones Etienne GrandJean Gruppetto, y depués, yá de nueche, a les 21.30 hores nel mesmu escenariu, nun conciertu nel que van participar los tamién llocales Duo Etienne Grandjean et Soïg. Mentes, los encargaos de zarrar la participación asturiana nesta edición del festival va ser Trebeyu na actividá 'Danses du Monde Celte', a les 14.30 nel Espace Marine, xunto colos córnicos Bolingey Troy, los gallegos Grupo de Baile Brincadeira, los escoceses Keltika Dancers, los maneses Ny Manninee y los irlandeses Planxty Or Rourke.

Contador Estadistiques