L'Intercélticu d'Avilés entra nel so tramu final, onde esperen Luar na Lubre y Celtas Cortos

El domingu va celebrase l'Andecha Intercéltica.

El XXV Festival Intercélticu d'Avilés y Comarca sigue la so marcha con un gran ambiente tolos díes en La Esposición, onde ta instaláu'l Mercáu Celta y la zona de comida, y entama a encarar el so tramu final. Nel horizonte los dos conciertos principales, entrambos per primer vegada de pagu, con un costu de 10 euros, el de los gallegos Luar na Lubre mañana y la de los castellanos Celtas Cortos el sábadu.

Pero enantes güei va haber una actuación de los gallegos Lume de Biqueira Celtic Band con convidaos, a la que va siguir una fiesta escocesa. A lo llargo del día van ambientar el festival Ximielga la Saya y la formación escocesa Strathaven & District Pipe Band.

Mañana van debutar los irlandeses Scoil Rince Cualann y va entamase la receición oficial de los participantes a les 12.30, con un desfile d'esta agrupación, la gallega, la escocesa y l'anfitriona Esbardu, organizadora del Intercélticu. Pela tarde va desplazase a Corvera la Strathaven & District Pipe Band, onde va tocar xunto con cola Banda Gaites de Corvera d'Asturies y el Grupu de Baille Tradicional de Corvera, y pela nueche va celebrase una folixa gallega depués de l'actuación de Luar na Lubre.

El sábadu la nueche va ser irlandes llueu del conciertu de Celtas Cortos, pero l'animación de les trés formaciones convidaes del Intercélticu va tar presente tol día. Xunto con Esbardu'l domingu van tomar parte a les 19.30 hores n'Andecha Intercéltica, eventu que va servir de pieslle y nel que van sonar los himnos de les cuatro naciones celtes presentes.

Na imaxe, Strathaven & District Pipe Band. Semeya propiedá del Festival Intercélticu d'Avilés y Comarca.