L’Intercéltico d’Occidente renueva la Noite Máxica d’un festival que “supón una inyeición pa Tapia”

La Noite Máxica, l’eventu más popular del Festival Intercéltico d’Occidente (FID’O), va camudar el formatu nesta edición col oxetivu “de facer dalgo diferente”, apunta’l direutor del certame Martín Fernández Cascudo. Ésti comienza esti miércoles en Tapia y va allargase hasta’l llunes cola participación de 200 músicos.

L’izáu de la bandera celta a les 19.30 hores, col acompañamientu de les gaites, va abrir la ventena tercer edición del FID’O, una iniciativa entamada pola Banda de Gaitas d’Occidente que pon a Tapia nun llugar destacáu ente los festival dedicaos a la música de raigañu célticu. Formaciones d’Éire, Alba, Breizh, Galicia o Xapón van sumase estos díes a otres asturianos pa enllenar la villa d’actividá.

“L’Intercéltico supón una inyeición pa Tapia”, esplica Fernández Cascudo, que cifra en 200 los músicos que van pasar pel FID’O estos seis díes, a lo qu’hai que sumar los aficionaos procedentes de dientro y fuera d’Asturies que s’averen a esti puntu del occidente del país. “Hai un gran ambiente mientres tol festival y los hoteles y la hostelería vense mui beneficiaos”, añade.

Conciertos, charres, talleres, una esposición o un mercadín celta componen les actividaes del Intercéltico, que tien como eventu principal la Gran Noite Máxica. Esta celebración va desendolcase’l sábadu, a les 23.30 hores, na playa del Murallón y va contar con un cambiu de formatu cola fin de “facer dalgo diferente. Queríamos innovar depués de tantos años basándola en representaciones teatrales y nesta ocasión vamos entamar un monólogu humorísticu nel que va dir intercalándose delles bandes”.

El televisivu Laude Martínez va ser el conductor del eventu, dando pasu a la Banda de Gaitas y el Grupo de Baile Tradicional La Madreña, el Grupo Etnográficu Das Mariñas (Galicia), la Banda de Gaites de Castrillón, la Bagad Dor Vras (Breizh), la Banda de Gaitas Agarimo de Catabois (Galicia), la Dominic Graham School of Irish Dance (Éire) y la llocal Banda de Gaitas Marino Tapiega.

Murallón Folk

La nueche del vienres y del domingu tamién va haber dos nueches celtes na sablera baxo’l nome de ‘Murallón Folk’. La primera va acoyer dende les 23 hores les actuaciones de la Dominic Graham School of Irish Dance, los asturianos Slum Suit y Fourth Moon, banda qu'amiesta músicas escocesa y irlandesa con componentes de delles nacionalidaes.

El domingu, mentes, va comenzar a les 22.30 y va contar cola participación del gaiteru Rubén Alba y de los xaponeses Harmonica Creams. Les actuaciones nocherniegues van completales güei Compañeras (21 hores, Auditorio) y Los Kikos del Maíz mañana nuna verbena tradicional (23.30 hores, puertu).

Mentes, el mercáu celta, que s’inaugura a les 19.45 hores d’esta tarde, va abrir tolos díes a les 11 hores, momentu nel que comenzarán les munches actividaes programaes pa estos díes nel FID’O. Ente éstes destaquen l’Homenaxe a los Marineros (vienres 13 hores, mirador d’Os Cañói) y el desfile de l’Alborada del Mar (domingu 11.30 hores, con salida del muelle).