L'Institutu Asturianu de la muyer pide "tolerancia cero" cola violencia de xéneru

L'Institutu Asturianu de la Muyer (IAM) y la Conceyalía de la Muyer d'Uviéu ficieron públicu un manifiestu en que conseñen la so condena al asesinatu de la ciudadana portuguesa Isaura Pascoal, que tuvo llugar en Güeñu (La Ribera) y del que ye presuntu autor el so maríu.

Pal IAM, en cuenta de tratase d'un fechu aislláu, esti asesinatu constitúi "ún casu más de violencia de xéneru, que ye la que s'emplega contra les muyeres pol cenciellu fechu de selo". L'IAM diz que no que se lleva d'añu yá son venti les muertes que se rexistraron n'España por causa d'esta violencia, anque n'Asturies ye la primera dende l'asesinatu d'Elena Hevia n'agostu del 2005. L'IAM y la Conceyalía de la Muyer d'Uviéu píden-y a la ciudadanía "tolerancia cero cola violencia contra la muyer" y recuerden que la víctima presentaba un llargu historial d'ingresos en cases d'acoyida de la Rede Autonómica, siendo que vivía nuna hasta agora mesmo. L'IAM diz que'l casu d'Isaura aseméyase abondo a otros "en cuantes que la víctima, en cuenta de buscar una condena xudicial contra l'asesor, va tres d'un arrepentimientu del agresor, como foi'l casu, siendo qu'esti consigue'l perdón xudicial entamando una espiral d'agresión-arrepentimientu y perdón que pue llegar a dar resultaos fatales".