L’Instituto Cervantes de Bruxeles dexó fuera al asturianu na so celebración pol Día Européu de les Llingües

Siete poetes recitaron los sos versos en castellanu, gallegu, eusquera y catalán nel Instituto Cervantes de Bruxeles pa celebrar esti 26 de setiembre’l Día Européu de les Llingües. El secretariu xeneral de Podemos, Pablo Iglesias, sí recordó l’asturianu en redes nesta fecha al traviés d’un poema de Vanessa Gutiérrez.

“Las cuatro lenguas de España”, como destacaba esta institución na información fecha pública na so web, tuvieron representaes nesti actu, dexando fuera otros idiomes estatales, como l’asturianu o l’aragonés. Bernardo Atxaga, Yolanda Castaño, Joan Margarit, Elena Medel, Manuel Rivas, Eloy Sánchez Rosillo y Estel Solé conformaron la llista de poetes convidaos pa participar nel eventu entituláu ‘Versos de la España diversa. Recital de poesía en las lenguas de España’.

Les redes sociales foron, un añu más, un mediu nel que munches persones aprovecharon pa recordar esta xornada cola que la Comisión Europea celebra la diversidá llingüística del continente. Ente tolos mensaxes destacó’l d’Iglesias, que xubió un tweet con un videu nel que la diputada de Podemos Sofía Castañón recitaba’l poema de Gutiérrez ‘Patria’.