L'IES Xovellanos dedica per primer vez unes xornaes al asturianu

Xosé Ramón Iglesias Cueva protagonizó la conferencia inaugural, que xiró sobre'l plurillingüismu y la diversidá cultural.

El decanu de los institutos asturianos, l'lES Xovellanos, fundáu pol propiu Gaspar Melchor de Xovellanos, dedica esta selmana per primer vegada unes Xornaes de Llingua asturiana. "La idea ye dar una visión amplia de les posibilidaes del idioma, non centrase namás na lliteratura, que tamién va tener el so espaciu, sinón tocar l'usu del asturianu nel ámbitu de la comunicación más actual y l'ociu, por exemplu", esplica Inaciu Galán, profesor de Llingua Asturiana y Lliteraruta del centru y coordinador de les actividaes xunto cola docente Marta Mori.

'L'asturianu nel ámbitu de les llingües d'España' foi la conferencia inaugural celebrada esta mañana, enfocada a les alumnes y alumnos de Bachillertatu. Nella Iglesias Cueva, secretariu de l'Academia de la Llingua Asturiana, faló sobre'l plurillingüismu y la diversidá cultural, dando delles pingarates sobre la historia del asturianu y la so situación anguaño.

Les Xornaes de Llingua Asturiana van siguir mañana con un recital poéticu de Sabel de Fausta, escritora decana de les lletres asturianes, y un coloquiu colos estudiantes, ente los que ta la so nieta, lo que lo va convertilu nun actu especialmente emotivu. El vienres va poner el ramu a esta iniciativa la ex alumna del centru y comunicadora en redes y na televisión y radio públiques asturianes, Alma Hidalgo, cola charra 'Ser youtuber y presentadora n'asturianu'.

La figura del ilustráu y la so hermana Xosefa

Nel cartelu d'esta iniciativa nun podía faltar Xovellanos y la so hermana Xosefa, primer muyer escritora que se conoz. "Quier ser un símbolu del importante venceyu d'esti institutu col asturianu dende la so fundación. Equí l'asignatura lleva munchos años y ta dafechu normalizada na actividá del centru. Amás hai una sensibilidá especial ente'l profesoráu sobre la cuestión llingüística d'Asturies", esplicó Galán.

Na semeya, Galán; Iglesias Cueva; Juan Luis Díaz Sirgo, xefe del Departamentu de Lengua Castellana y Literatura; y Mori. A la derecha, un cartón cola figura representada de Xovellanos.