L’HUCA rexistra un casu de listeriosis nun paciente de 64 años ensin vinculación col brote d’Andalucía

L'Hospital Universitariu Central d'Asturies (HUCA) rexistró un casu de listeriosis nun paciente de 64 años ingresáu na Unidá de Cuidaos Intensivos (UCI). Trátase d'un casu clínicu aislláu d'afección pola bacteria Listeria monocytogenes, que nun guarda nenguna relación col biltu aniciáu n'Andalucía por consumu de carne mechada de la marca La Mechá. L'enfermu permanez na UCI, ta recibiendo tratamientu y evoluciona favorablemente.

El conseyeru de Salú, Pablo Fernández Muñiz, axuntóse esti mediudía nel HUCA col xerente del área IV, Luis Hevia, el director xeneral de Salú Pública, Antonio Molejón, y el xefe del Serviciu de Microbioloxía, Fernando Vázquez, pa recibir información sobre'l casu.

El 10% de la población ye portadora de la bacteria ensin qu'haya riesgu pa la so salú. Nesta ocasión, trátase d'un enfermu inmunodeprimíu, con tratamientos antibióticos previos pa tratar otros xermes que colonicen frecuentemente l'organismu como la Serratia marcescens y la Candida albicans, lo qu'esplica que desenvolviera una infección pol microorganismu.

L'hospital echó anunció’l casu al serviciu de Vixilancia Epidemiolóxica, como marca'l protocolu n'enfermedaes de declaración obligatoria (EDO). Amás, como en tolos casos d'afección por esta bacteria, l’HUCA va unviar una muestra del cultivu tomáu al Institutu Carlos III pa que faiga un tipaxe del xenoma del xerme, que se va incluyir na so base de datos.

N’esti añu, rexistráronse 13 casos aisllaos por listeriosis n'Asturies.