L’HUCA aumentó l'usu de la monitorización neurofisiolóxica

|
Francisco del Busto ne III Congresu Avanzáu de Monitorización Neurofisiolóxica Interoperatoria en Ciruxía Infantil

L'Hospital Universitariu Central d'Asturies (HUCA), pionera nel Estáu na monitorización neurofisiolóxica intraoperatoria, vien estendiendo esta téunica nos tiempos últimos, con más de 200 intervenciones nel 2017. Con ella previénse’l riesgu de mancadura mientres la ciruxía y l’amenorgamientu de les remortines.

La monitorización neurofisiolóxica intraoperatoria consiste nel usu d'un conxuntu de téuniques pa evaluar la función nerviosa en determinaes operaciones. Úsase p'ameyorar la seguridá y la resultancia de les intervenciones, una y bones los neurofisiólogos ayuden al ciruxanu a deteutar posibles daños nes estructures nervioses primero qu’estos sían irreversibles.

Pa realizala úsense hasta mediu centenar d'electrodos d'estímulu y rexistru que se coloquen al paciente, yá anestesiáu, cola collaboración del personal d'enfermería. La llectura d'esos rexistros dexa al neurofisiólogo, presente nel quirófanu mientres tola intervención, realizar estudios pa deteutar, según los casos, la proximidá o la integridá funcional de distintes estructures nervioses.

El serviciu de neurofisioloxía del HUCA, coordináu por Consuelo Valle, tien una trayeutoria llarga nel usu d'estes téuniques, qu'amenorguen les remortines posquirúrxiques con un costu económicu baxu. Va cuasi trés décades foi pioneru n'Estáu en monitorizar la ciruxía de la escoliosis.

Depués empezó a facelo, de forma vanguardista n'Europa, coles intervenciones a pacientes con síndrome d’Arnold-Chiari y, unos años más tarde, tamién con operaciones neuroquirúrxiques, ente les que s'inclúi la ciruxía de los trestornos del movimientu.

Na semeya, el conseyeru de Sanidá, Francisco del Busto, nel III Congresu Avanzáu de Monitorización Neurofisiolóxica Interoperatoria en Ciruxía Infantil.

Contador Estadistiques