L’Hospital de Cabueñes abre una unidá dedicada a la esclerosis múltiple

|
L’Hospital de Cabueñes abre una unidá dedicada a la esclerosis múltiple

600 pacientes afeutaos pola esclerosis múltiple van vese beneficiaos pola apertura d’una unidá de tratamientu d’esta enfermedá nel xixonés Hospital de Cabueñes. Ye la primera que s’abre n’Asturies destinada al abordaxe esclusivu de la patoloxía neurodexenerativa y discapacitante.

La unidá dispón de dos consultes coordinaes polos especialistes de Neuroloxía qu’ufierten serviciu diariu a los pacientes, amás d’atender les urxencies que puedan surdir poles complicaciones de la mesma enfermedá o polos efeutos adversos de los tratamientos. La xefa de la seición de Neuroloxía de Cabueñes, Dulce María Solar, va tar al mandu de la mesma, mentes que Dionisio Fernández Uría va encargase de la so coordinación. Tamién formen parte de la mesma’l neurólogu Roberto Suárez Moro y la enfermera Delia Rubio, amás de los médicos internos residentes de Neuroloxía y Farmacia, en rotación.

La esclerosis múltiple ye una enfermedá del sistema nerviosu qu’afeuta al cerebru y a la médula espinal. Ataca a la mielina, el material qu’arrodia y protexe les célules nervioses, lo que bloquia los mensaxes ente’l cerebru y el cuerpu o los fai más lentos, de manera que pue provocar alteraciones de la vista, debilidá muscular, problemes cola coordinación y l’equilibriu, sensaciones como entumecimientu, pruyidura o pinchazos y lapsus de memoria.

La so causa, desconocida, ye más frecuente ente les muyeres qu’ente los homes y suel empezar ente los 20 y los 40 años, polo qu’afeuta de forma direuta a la vida social y familiar de los pacientes, amás d’al so desenvolvimientu profesional. Un tratamientu correutu y un manexu afayadizu de la enfermedá dexen caltener los síntomes baxo control y retrasar la progresión de la discapacidá.

La patoloxía suel cursar en brotes, polo qu’esiste una demanda grande d’atención ensin programar, que provoca un índiz altu de visites a urxencies. Esti fechu pue eliminase de dalguna manera cola creación d’una unidá de bon accesu onde’l paciente pueda consultar duldes, recibir meyor atención y adpatar el so tratamientu.

1.300 afeutaos nel país

Anguaño n’Asturies hai unes 1.300 persones afeutaes por esta enfermedá. La complexidá del diagnósticu y tratamientu de la enfermedá ye’l factor principal qu’impulsó la creación de la unidá nel Hospital de Cabueñes, porque se trata d’una patoloxía qu’esixe un enfoque perespecializáu y un control continuu y meticulosu de los pacientes pa evaluar la efectividá de los tratamientos y los sos posibles efectos secundarios.

Na semeya, l'equipu médicu de la unidá con dellos pacientes.

Contador Estadistiques