L'historiador Rodríguez Alonso va presentar la obra ‘De totalitarios a «demócrates»’ n’El Llano

El Centru Municipal Integráu d’El Llano va acoyer esti miércoles la presentación de la obra última del historiador xixonés Pablo Rodríguez Alonso. ‘De totalitarios a «demócrates»’ algamó’l XII Premiu d’investigación histórica Rosario de Acuña.
 
Zahorí Ediciones ye la editorial qu’espubliza esti llibru que tien el nome completu de ‘De totalitarios a «demócrates» Franquismu, fascismu y nazismu na II Guerra Mundial al traviés del diariu xixonés Voluntad’. Nesta investigación Rodríguez Alonso (Xixón, 1979) fai un repasu al discursu ellaboráu dende Voluntad, mediu d’espresión oficial del falanxismu xixonés, un periódicu que va ser la voz de los vencedores de la Guerra Civil y nel que los mensaxes de venganza contra los vencíos, d’emponderamientu del totalitarismu nazi y fascista y de denuncia de la democracia y les llibertaes van ser una constante. Sicasí, como conseña’l llibru, esi discursu va dir cambiando a medida que l’escenariu internacional, marcáu pola Segunda Guerra Mundial, vaya averándose a la derrota final d’Alemania, Italia y Xapón.
 
Na presentación del llibru n’El Llano (cai Río d’Oru 37, Xixón), que va principiar a les 19.30 hores, van intervenir, amás del autor, Faustino Zapico, profesor de Xeografía y Historia del IES Bernaldo de Quirós, y Macrino Fernández, de Zahorí Ediciones.