L'Executivu pretende l'aprobación de polo menos seis lleis no que queda de llexislatura

|
Conseyu de Gobiernu del 9 de xineru cola ausencia de Genaro Díaz

Les comparecencies informatives sobre proyeutos comiencen esti xueves na Xunta Xeneral col correspondiente al de Participación y Promoción Xuvenil.

El Conseyu de Gobiernu analizó na so reunión d'esta mañana les prioridaes llexislatives de los próximos meses con la fin d'impulsar l'aprobación de les lleis que tramita anguaño'l Parllamentu, sobre manera la de Salú y les referíes a los Derechos y Prestaciones Vitales pa Cubrir Necesidaes Básiques, la Llibre Espresión de la Identidá Sexual y/o de Xéneru de les Persones Trans, l'Aición Concertada con Entidaes d'Iniciativa Social ensin Ánimu d'Arriquecimientu pa la Prestación de Servicios de Caráuter Social, la Participación y Promoción xuvenil, y l'Actividá física y el Deporte. En total seis normes que l'Executivu pretende aprobar no que queda de llexislatura, ensin descartar otres iniciatives.

Pa ello, nestes dos primeres selmanes d'actividá na Xunta Xeneral van entamase les comparecencies informatives correspondientes a cinco d'elles. La primera va ser mañana a les 9 hores na sala Constitución, sobre'l proyeutu de Llei de Participación y Promoción Xuvenil, cola intervención del conseyeru de Presidencia y Participación Ciudadana, Guillermo Martínez Suárez.

La siguiente de les marcaes pol Executivu "que consoliden y garanticen derechos y servicios fundamentales pal conxuntu de la población y qu'ufre respuestes a personas en situación de vulnerabilidá o que sufren dalgún tipu de discriminación" va tener llugar el llunes a les 16 hores, cola presencia de la conseyera de Servicios y Derechos Sociales, Pilar Varela, y va centrase nel proyeutu de Llei sobre Aición Concertada con Entidaes d'Iniciativa Social ensin Ánimu d'Arriquecimientu pa la Prestación a les Persones de Servicios de Caráuter Social. Pente medies, celebraránse otres sobre la gratuidá de los llibros de testu y el material curricular o la modificación de la llei de caza.

Na imaxe, momentos previos a la reunión del Conseyu del Gobiernu, nel que nun participó Genaro Díaz, conseyeru d'Educación y Cultura, presente en Madrid p'asistir a la Conferencia d'Educación. Semeya obra d'Armando Álvarez.

 

Contador Estadistiques