L'executivu da 548.000 euros pa la restauración d’horros y paneres

L'últimu Conseyu de Gobiernu del añu 2006 concedió una partida presupuestaria de 547.500 euros empobinada a la restauración d'horros, paneres y cabazos. Particulares y instituciones ensin enfotu d'arriquecimientu van poder beneficiase d'estes ayudes públiques a la restauración d'esta parte tan identitaria del patrimoniu etnográficu asturianu.

Asturies ye la tierra del horru, siendo'l país de la costa cantábrica onde más se dan esti tipu de construcciones, de les que s'alcuentren variantes cola mesma función dende Galicia hasta Euskadi. A día de güei perítase qu'hai más de 10.000 horros, la metada de los que llegaron a tar llevantaos nel últimu espoxigue d'esti tipu de construcciones a últimos del sieglu XIX, y ello ye que la so destrucción avanza a toa velocidá, en cuantes qu'estos antiguos almacenes de la collecha yá va tiempu que tan perdiendo adulces la so función, lo que los lleva al abandonu y al desaniciu, ello amás d'otros axentes agresivos qu'actuen contra ellos como son la urbanización d'aldees y barrios na contornada de les ciudaes.

Mirar tolos años el teyáu y reteyar pa que nun pingue l'agua dientro d'ellos, asegurase de que nun tean criando xuegu pieces como la muela y el trabe, comprobar que los pegollos tean bien afitaos y atender a que nun s'abomben, apodrigañen o venzan trabes y lliños son los curiaos más urxentes qu'han de tenese con un horru. De va unos años p'acá delles empreses de carpintería tan especializaes na restauración d'estes construcciones.