L'Executivu abre la segunda fase d'aportaciones pa la Llei de Participación

Celebró en Cangas del Narcea la primer sesión y tien prevista una ventena de conceyos con entidaes y coleutivos.

El conseyeru de Presidencia y Participación Ciudadana, Guillermo Martínez Suárez, dio ayeri a conocer les orientaciones del proyeutu a una representación amplia d'asociaciones y coleutivos vecinales y ciudadanos d'esta población –tamién taba presente l'alcalde, José Víctor Rodríguez–, abriendo asina la segunda fase de busca d'aportaciones pa la ellaboración del anteproyeutu de Llei de Participación Ciudadana. La conseyería presentó hasta la fecha'l procesu a mediu centenar d'asociaciones del tercer sector, caltuvo sesiones de trabayu colos sindicatos UXT y CC OO y celebró una sesión monográfica cola Federación Asturiana de Conceyos (FACC).

El primer trámite desenvolvióse ente'l 2 d'ochobre y el 15 de payares y consistió na apertura d'un procedimientu de consulta pública p’atropar les opiniones de la ciudadanía y les organizaciones más representatives potencialmente afeutaes pola futura norma. Asina mesmo, ente'l 24 de payares y el 27 d'avientu celebráronse xuntes en Xixón, Tapia, Tinéu, Mieres, Parres y Uviéu, a les qu'asistieron casi mediu centenar d'asociaciones y entidaes sociales, ciudadanes y del tercer sector. Tamién se caltuvieron alcuentros de trabayu colos sindicatos mayoritarios y una sesión monográfica cola FACC, a la qu'asistieron representantes de Navia, Casu, Miranda, Avilés, Valdés, Les Regueres, El Franco y Morcín.

Nesta ronda nueva, la Direición Xeneral de Participación Ciudadana da continuidá a les aiciones puestes en marcha pa la ellaboración d'una normativa nacional que regule'l derechu de participación ciudadana y impulse un modelu nuevu de gobernanza de los asuntos públicos. La ellaboración d'esta llei ye un compromisu del Gobiernu pa impulsar polítiques que promuevan la implicación activa de la ciudadanía y conformar asina un modelu de democracia participativa.

Esta prioridá tien tamién reflexu na aprobación d'un Llibru Blanco de la Participación y la puesta en marcha d'un Portal nuevu de Gobiernu Abiertu, iniciatives impulsaes el pasáu añu pola conseyería. La ellaboración d'un anteproyeutu de Llei de Participación Ciudadana ye la tercer iniciativa llexislativa que promueve Presidencia nesta llexislatura y súmase a los proyeutos de Llei de los Asturianos nel Esterior y de la Reconocencia d'Asturianía, y la Llei de Tresparencia y Bon Gobiernu.