L’ex presidente Álvarez Areces muerre de sópitu a los 75 años

L’anguaño senador, ex alcalde de Xixón y presidente d’Asturies ente los años 1999 y 2011, Vicente Álvarez Areces, morrió esta madrugada nel so domiciliu de Xixón a consecuencia d’un derrame cerebral. Tini, como yera conocíu, ye una figura histórica de la política asturiana, con una xestión que condicionó una dómina.

Nacíu nel 1943, del barriu L’Arena, comenzó la so trayeutoria nel Partido Comunista de España (PCE) en plenu franquismu, involucrándose nel movimientu estudiantil na so etapa universitaria en Santiago de Compostela pa cursar Matemátiques. Llegaría a ser secretariu xeneral del partíu n’Asturies y miembru del Comité Central, pero saldría del partíu nel 1978 na conferencia de Perlora xunto con otros 109 delegaos por discrepancies pol so desarrollu, llegando ser espulsáu de militancia tiempu depués.

El so destín sería’l PSOE, que confiaría nél nel 1987 pa relevar a José Manuel Palacio al frente de l’alcaldía de Xixón. Álvarez Areces ganaría eses eleiciones y taría al frente del conceyu 12 años, hasta’l 1999, tiempos na que la ciudá vivió una importante llaváu de cara urbanísticu tres la reconversión industrial y nel que s'apostó por un modelu de ciudá con más importancia de la cultura y los servicios.

El siguiente pasu, la Xunta Xeneral, onde entró con una mayoría absoluta y na que permaneció como presidente del país tamién 12 años. Foi la época más escura d’Álvarez Areces, cola solombra de casos de corrupción nel so Gobiernu que nun acabaron por chiscalu personalmente pero que sí llegaron a los tribunales, como’l casu Marea.

Les sos polítiques fixero por sacar a Asturies del aislamientu y la introducción del país na modernidá y el desarrollu, anque l'arecismu tamién tuvo como seña de identidá lo que se conocería polos sos críticos como  "cosmopaletismu", ye dicir, l'arrequexamientu de la cultura asturiana como ún de los elementos definitorios de la modernidá d'Asturies. Per otru llau, el sobrecostu d’El Musel o la ZALIA foron otros puntos prietos de la so xestión, amás de desafortunaos comentarios, como cuando calificó como “lleenda urbana” a la emigración forciada de la mocedá asturiana a Madrid y a otros puntos del Estáu y Europa.

Tampoco nun se destacó por sofitar la llingua asturiana, siendo bien conocíos los sos episodios cola Pita de la Xunta pola Defensa de la Llingua Asturiana. Sicasí, condicionáu pola necesidá de pautos con Izquierda Xunida, baxo los sos mandatos echó andar una direición xeneral de Política Llingüística y comenzó’l procesu de recuperación toponímica siguiendo’l mandáu de la Llei d’Usu y Promoción del Bable/Asturiana aprobada na llexislatura anterior a la so llegada al cargu.

Tres dexar la Xunta Xeneral pasó a Madrid pa facer llabores de senador. Ésta yera la segunda llexislatura na que resultaba escoyíu polos ciudadanos asturianos.

Reaiciones

Asturies despertó esta mañana sobresaltada pola muerte d’Álvarez Areces y nun tardaron les reaiciones institucionales, de compañeros de partíos, rivales políticos y ciudadanos. Xixón decretaba trés díes de llutu, al igual que’l Gobiernu d’Asturies, instalándose nel salón Europa de la Xunta Xeneral la so capiella ardiente dende les 14 hores hasta les 21 de güei y mañana de 9 a 11 hores, pa treslladala darréu a Xixón, onde va tar abierta hasta les 19 hores.

Na mañana del domingu, mentes, va celebrase un actu civil na Llaboral. Adrián Barbón, secretariu xeneral de la Federación Socialista Asturiana (FSA), el presidente d'Asturies Javier Fernández, el presidente del Gobiernu estatal Pedro Sánchez y políticos de tolos colores amosaron güei en redes sociales el so ablayamientu pola noticia.

Inmensa tristeza por la pérdida de un amigo, un servidor público, comprometido siempre, excelente alcalde de Gijón y Presidente de Asturias. Mis condolencias a familia y amigos de Vicente Àlvarez Areces, en mi nombre y en el de todo el Gobierno. Hasta siempre a un gran compañero.

— Javier Fernández (@javier_asturias) 17 de enero de 2019

Gracias por todos los mensajes llenos de cariño hacia Tini Areces. Os aseguro que la militancia de la @FSA_PSOE está rota de dolor por su fallecimiento. Todo nuestro cariño hacia su mujer e hijos. Se nos va alguien sencillamente irrepetible.

— Adrián Barbón (@AdrianBarbon) 17 de enero de 2019

Nos deja Vicente Álvarez Areces. Trabajador incansable, un hombre comprometido con la libertad y la democracia. Gijón y Asturias vivieron grandes transformaciones en sus años al frente de la Alcaldía y del Principado. Mi cariño para su familia y los compañeros de la @FSA_PSOE. https://t.co/tc6xZUg164

— Pedro Sánchez (@sanchezcastejon) 17 de enero de 2019

Estoy consternada por el repentino fallecimiento de Tini Areces. Su pasión política y su pasión por Asturias le definieron. A su esposa Marisol, a sus hijos y familia, mi mas sentido pésame. Descanse en paz

— Mercedes Fernández (@cherines_pp) 17 de enero de 2019

Desde el Ayuntamiento de Gijón lamentamos la pérdida de Don Vicente Alvarez Areces, el que fue alcalde entre los años 1987 y 1999. Descanse en paz. pic.twitter.com/inie7TcsWX

— Carmen Moriyón (@carmenmoriyon) 17 de enero de 2019