L'Etnográficu de Porrúa organiza un concursu de fotografía antigua

El Muséu Etnográficu del Oriente d'Asturies tien abiertu'l plazu pa presentar semeyes al so I concursu de semeyes antigües, col que quier sensibilizar a los ciudadanos sobre la importancia del patrimoniu históricu que guarden nos sos archivos de casa. Les meyores semeyes qu'espeyen les tradiciones, cambios sociales, urbanos y rurales van recibir premios d'hasta 200 euros por cada categoría.

El concursu ta abiertu a semeyes que recueyan cualquier actividá o circunstancia que tuviere llugar nel oriente asturianu, emponderándose especialmente les que representen elementos del patrimoniu históricu y cultural, llabores, fiestes, tradiciones y aquelles que faigan el retratu de los cambeos del paisaxe del oriente asturianu. Cuatro estayes temátiques con 200 euros por categoría son les que tan abiertes, y son les de familia, trabayu, fiestes y la de paisaxe y arquitectura. Aparte d'estes categoríes acútase un premiu especial de 300 euros a la meyor semeya pola so antigüedá, aporte históricu o orixinalidá.

Les semeyes han presentase tal cual tean, ensin falta de retoque nin igua nenguna, acompañaes de los datos del propietariu o autor, teniendo que llegar al Muséu enantes de la reunión del Xuráu, que va ser el 20 de xunetu. Nun hai tope nel númberu de semeyes que puen unviase, siempre que sían inédites. El Muséu comprométese a devolver los orixinales a los propietarios, anque podrá facer una copia dixital de les mesmes.