L'estudiu sobre’l valir del asturianu pa los direutivos de Primaria soprende a los nuesos llectores

L’avance del estudiu ‘Valir cultural y educativu de la escolarización de la Llingua Asturiana’ llamó l’atención a los usuarios d’Asturies.com. Un 66 por cientu amosó en ‘Conceyu Abiertu’ la so sorpresa polos datos positivos del mesmu.

Esta investigación de l’Academia de la Llingua Asturiana encargada al Departamentu de Ciencies de la Educación de la Universidá d’Uviéu, en concreto a Isabel Hevia Artime, esperta que yá collaborara enantes cola institución académica, descubrió la bona disposición de los equipos direutivos de los centros públicos de Primaria pa col idioma, dando-y un valir cultural y educativu importante al so enseñu. Amás, amosó’l conocimientu que tienen de la llingua asturiana, yá qu’ocho de cada diez xestores manifestó saber asturianu. L’avance de datos fechu por Hevia sorprendió al 66 por cientu de los usuarios d’Asturies.com que participaron nel nuesu ‘Conceyu Abiertu’, mentes qu’un 28 por cientu consideró estos resultaos como los esperaos. Otra manera, un 5 por cientu votó pola opción ‘Nun sé’.

Dende esti mesmu momentu, los nuesos llectores yá pueden participar nun ‘Conceyu Abiertu’ nuevu. Nesta ocasión queremos conocer si creen que’l 2013 foi un bon añu pal idioma del país o tolo contrario.