L'estudiu del Carlos III da valir a entemecer Pfizer con AstraZeneca

La Comisión de Salú Pública va tomar una decisión al respeuto esti martes en menores de 60 años. 47 positivos n'Asturies esti llunes, cuando finó un home de 73 años.

Los resultaos preliminares del ensayu clínicu CombivacS desendolcáu pol Institutu de Salú Carlos III determinen que la vacunación d'una segunda dosis col preparáu Comirnaty de Pfizer/BioNTech a les persones menores de 60 años que recibieren primero la Vaxzevria d'AstraZeneca ye "altamente inmunoxénica y nun presenta problemas de reactoxenicidá postvacunación diferentes a los yá comunicados nel uso homólogu (en solitariu) d'eses mesmas vacunes; esto ye, la respuesta del sistema inmunitariu poténciase muncho depués de la segunda dosis de la vacuna Comirnaty, mientres que los efeutos adversos observaos entren dientro de lo esperado, son de calter leve o moderáu y restrínxense mayoritariamente a los primeros 2-3 díes depués de recibir la vacuna". Un total 673 persones entraron a formar parte d'esti estudiu dende'l 17 d'abril, de los que 441 recibió la segunda dosis y 232 tán nel grupu control qu'entovía nun la recibió.

Un 56 por cientu foron muyeres, xéneru afeutáu polos trombos detectaos con AstraZeneca. Esta tarde la Comisión de Salú Pública, formada pol Ministeriu de Sanidá y les autonomíes, va decidir si finalmente, llueu de conocer los datos del ensayu clínicu, va permitir l'alministración de Pfizer a los munchos ciudadanos menores de 60 años ensin pauta completa depués de recibir la d'Oxford nun primer momentu, agora destinada al grupu d'edá de 60 a 69 años.

Tasa de positividá diaria del 2,41 por cientu

A falta de la espublización de los datos oficiales de la COVID-19, la Conseyería de Salú comunicó ayeri 47 casos nuevos –l'actualización sumó 2 casos más non contabilizaos en díes anteriores–. Son 7 más que'l domingu, con una tasa de positividá diaria menor, del 2,41 por cientu pol 2,82 por cientu.

A 7 díes esti porcentaxe yera enantes de l'actualización del 2,87 por cientu –ayeri baxó al 2,85 por cientu–. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

Esta xornada hai que llamentar la muerte d'un home de 73 años, la 1.961 del andanciu. Hai 63 pacientes hospitalizaos con confirmación o sospecha de COVID-19, a los qu'hai que sumar 30 que tán na UCI, lo que suponen 11 y 4 menos que'l domingu, de manera respeutiva.

Na semeya, actu de presentación del ensayu clínicu CombivacS.