L’estudiante que recibió torgues en Ḷḷena pa dar asturianu llamenta “que teamos entovía asina dende’l 98”

Juan Santos, estudiante de segundu de Bachilleratu del IES Santa Cristina de Ḷḷena, ta acabante de denunciar les torgues qu’atopó esti cursu pa siguir recibiendo clases de Llingua Asturiana. La situación paez que ta cerca de solucionase, pero llamenta “que teamos entovía asina dende’l 98, cuando s’aprobó la Llei d’Usu”.

“El miércoles pasáu fixi la matrícula y el llunes dícenme que tengo qu’escoyer ente les dos alternatives qu’hai porque’l profesor de Llingua Asturiana nun tenía hores suficientes”, esplica Santos. L’estudiante, énte tal situación, movióse rápido pa exercer el so derechu a continuar colos sos estudios de Llingua Asturiana, pero nun tuvo otra que matriculase n’otra materia mientres se soluciona esti casu que tamién afeuta a otra alumna.

Asina, contautó con Iniciativa pol Asturianu, que-y asesoró sobre’l tema, y punxo una quexa al día siguiente nel centru. Dende l’institutu desconocíen la posibilidá de solicitar una ampliación de xornada del maestru qu’imparte asturianu y paez qu’hai disponibilidá d’iguar la situación. Mentes, el coleutivu cívicu treslladó tamién el casu a la Conseyería d’Educación y Cultura.

“Somos conocedores de qu’esta situación nun ye única, y que munchos centros tienen una insuficiente cantidá d’hores del profesoráu d’asturianu, tanto nel sistema públicu como nos centros concertaos, lo que fai que los contratos pal profesoráu d’asturianu seyan n’ocasiones d’hora y media a la selmana, o que los grupos de Llingua Asturiana axunten hasta 30 alumnos de distintos niveles y grupos”, apunta Iniciativa pol Asturianu, que recuerda “la escasa dotación pa impartir l’asignatura de Llingua Asturiana y la precarización de la formación que supón”, polo que son necesaries soluciones “que xeneralicen la presencia de l’asignatura ensin esti tipu de torgues cada comienzu de cursu”. “Pidimos de nuevo que nun haya nengún alumnu ensin accesu a l’asignatura en nengún centru públicu o concertáu d’Asturies, tal y como establez la llei. Nun pue ser qu’un alumnu que quiera estudiar asturianu tenga que pasar per procesos de reclamación que convierten la matrícula nun actu de resistencia cívica, sinón que tienen que se poner toles facilidaes”, añaden.

A la espera

Mentes llega la solución al casu, Santos va tener qu’acudir a clase de Proyeutos d’Investigación, perdiendo hores de Llingua Asturiana, asignatura que lleva cursando nel centru ensin problema dende primeru de Secundaria. L’estudiante llamenta “que teamos entovía asina dende’l 98, cuando s’aprobó la Llei d’Usu, y hai sentencies del Tribunal Supremu al respeuto”.