L'estrañu casu de la web de Batasuna

La illegalización del partíu políticu vascu Batasuna ta trayendo cola na rede. Amás del pieslle de les oficines o la prohibición pa organizar actos públicos, una de les midíes qu'apecíen nel autu del xuez Garzón yera la retirada de tola presencia oficial na internet del partíu. Ello ye que la web oficial ta allugada nun servidor de Colorado-EUA, colo que trancar la páxina oficial va ser más difícil de lo que parez. Batasuna, con sé agora en Francia, sigue actualizando'l web, pero parez que delles empreses proveedores d'accesu a internet tan metiendo-y filtros a la IP de Batasuna pa que los que naveguen con ellos nun puedan ver el web del partíu abertzale. Ye'l casu de Telefónica, qu'usuarios de los servicios d'esta casa dixeron ayeri que nun podíen entrar al web de Batasuna, anque dende la compañía nun hubo anuncia oficial confirmando que filtraren efectivamente la ip de Batasuna.Amás del web oficial Batasuna.org, tan daos d'alta (anque nun furrulen) los dominios Batasuna.com, Batasuna.net y tamién el nuevu sufixu Batasuna.info. Quien diere d'alta esti últimu dominiu tuvo'l macabru detalle de rexistralu a nome ná menos que d'Ernest Lluch, l'ex-ministru de sanidá del PSOE asesináu pola ETA nel añu 2000 (pue consultase en NetNames)