L'establecimientu hoteleru de Brañagallones va reabrir como refuxu de monte baxo xestión de la FEMPA

|

La Federación de Deportes de Montaña, Escalada y Senderismu del Principáu d'Asturies (FEMPA) va xestionar l'establecimientu hoteleru de Brañagallones, que va pasar a funcionar como refuxu de monte. El Gobiernu cede la instalación, zarrada dende hai nueve años.

Los conseyeros d'Emplegu, Industria y Turismo, Francisco Blanco, y d'Educación y Cultura, Genaro Alonso, formalizaron ayeri l'alcuerdu cola FEMPA pola que l'organismu federativu recibe una concesión de diez años del edificiu, hotel de trés estrelles zarráu dende'l 2007, pa que lo puedan utilizar escaladores y senderistes. El preciu pola estancia nesti puntu del Parque de Redes, asitiáu a 1.200 metros, va afitase en 10 euros y l'apertura ta prevista a medios del mes d'agostu por mor d'unes obres nes que'l Gobiernu invirtió 45.000 euros.

Tanto Juan Rionda, presidente de la FEMPA, como l'alcalde de Casu, Tomás Cueria, felicitáronse d'esta decisión del Executivu, demanda que dende la federación llevaben treslladando al Gobiernu dende hai munchos años. Con esti pasu podrán desendolcase dellos planes del ente, como la puesta en marcha d'una escuela d'iniciación al monte destinada a neños y neñes.

Contador Estadistiques