L'espolín pol "Centru Niemeyer" rescampla les tensiones n'IX

Izquierda Xunida d'Asturies presentó la campaña cola que va conmemorar el 75 aniversariu de la II República. El secretariu d'IX d'Asturies Jesús Iglesias aprovechó l'actu pa facer delles declaraciones sobre la polémica ente la conseyera Laura González y IX d'Uviéu pola construcción del "Centru Cultural Niemeyer"

El secretariu d'IX d'Asturies presentó la campaña n'alcordanza de los 75 años de la proclamación de la II República, qu e col nome "Construyendo República" pretende facer "reivindicación de la historia republicana y de los valores republicanos como constantes permanentes qu'anguaño tienen validez y qu'han configurar una propuesta de futuru de configuración del Estáu nuna república de vocación federal". Dientro d'esta campaña, IX va llevar alantre declaraciones institucionales nos Conceyos y na Xunta Xeneral del Principáu d'Asturies y va facer actos de reconocimientu y homenaxe a veteranos militantes defensores de la República.

Na mesma presentación Jesús Iglesias faló d'otros asuntos, ente ellos el "Centru Niemeyer" que dixo que yera d'una gran importancia p'Avilés. Iglesias llamentó les engarradielles verbales qu'asocedieron nos últimos díes alredor d'esta infraestructura, con referencia especial a los que tuvieron llugar dientro del so partíu y que tuvieron por protagonistes a la conseyera de vivienda Laura González y l'agrupación d'IX d'Avilés d'una parte y d'otra a l'agrupación uvieina d'IX, agrupación qu'axunta al mayor guañu opositor a l'actual directiva de la coalición.

Iglesias aclarió qu'IX d'Asturies y IX d'Avilés hai yá más de dos años que lleven sofitando oficialmente esti equipamientu p'Avilés y llamentó que l'agrupación d'Uviéu "sacare los pies del cestu nuna carrera d'insultos al portavoz municipal n'Avilés y a la Conseyera de Vivienda y Servicios Sociales" Iglesias púnxose de parte de la conseyera que declaró que "tien la mio solidaridá personal y la de la mayoría d'IX n'Asturies" Iglesias, que declaró que nun hai llugar pal insultu y la descalificación n'IX, amestó darréu en referencia a l'agrupación d'Uviéu que "hailos que sólo se descubren republicanos cuando s'empieza a dicir que'l Muséu Famosu de los Premios Príncipe, nun se va facer n'Uviéu".

Otramiente, Iglesias criticó la decisión de la Conseyería d'Educación de xeneralizar el sistema de conciertos n'educación infantil. Pa Iglesias "nun hai una estructura pública d'enseñanza infantil" y polo tanto la decisión de xeneralizar los conciertos supón una cesión a la particular.