L'espectáculu "Torner" yá ye discu

Ta acabante de salir al mercáu un discu que recueye l'espectáculu musical "Torner". Esti espectáculu creóse como un homenaxe al compositor y investigador de la tradición musical asturiana Eduardo Martínez Torner. Ello ye qu'esta obra musical ígüenla cantares entesacaos del Cancioneru de la Lírica Popular Asturiana, trabayu cimeru del mencionáu Martínez Torner.

El cancioneru de Martínez Torner foi y ye una auténtica ayalga de la música asturiana, yá que foi'l productu del trabayu de campu fechu pol propiu Torner a primero de sieglu. Gracies a esti trabayu pudo llegar hasta nós un encontu de música tradicional, recoyida con rigor abondo, y sirvió a munchos cantantes de tonada y grupos folk asturianos como fonte de la beber pa facer la so música. Asina, ta bien xustificao l'homenaxe a esta obra y el so autor, colo que nació Torner como espectáculu, cola sida de conmemorar el diecisiete de febreru d'anguaño los cincuenta años de la muerte del músicu asturianu. La voz d'Anabel Santiago y Alberto Varillas xunta la gaita del propiu Alberto, la mandolina, dobru y baxu de Michael Lee Wolfe, el curdión de María Álvarez y les percusiones de Manuel Cordero fueron los encargaos de facer nos escenarios esti repertoriu de cantares sacaos del cancioneru de Torner, esbilla de temes que fizo Ismael María González Arias. Esa música en directo pasa agora a soporte discográficu editáu pola casa de discos Ámbitu nun discu con 27 temes que se dividen en cuatro grupos Suite de romería, suite de filandón, suite de boda y suite vaqueira.