L'espectáculu de Nueche d'Insomniu yá tien discu

El cantautor asturianu Toli Morilla presentó esta selmana a los
medios de comunicación el so últimu trabayu discográficu,
un cd onde se recueye l'espectáculu Nueche d'Insomniu. El discu
espublízalu la casa de discos L'Aguañaz nuna edición de
muncha calidá, yá qu'al cd acompáñalu un llibretu
bien llargu coles lletres de los cantares, los testos del espectáculu y
hasta unes recomendaciones pa preparase pa sentir el discu.



Y ye que Nueche d'Isomniu tien los sos pegoyos na música creada por Toli
y na lliteratura de poetes contemporáneos qu'escriben en llingua
asturiana. Asina'l discu espeya l'espectáculu en directo que ye una
xuntanza ente'l teatru y la música, meciendo la narración en
forma de monólogu dramatizáu, la llectura de los poemes
orixinales y la interpretación de los cantares. Llevar p'alantre esti
proyectu foi y ye una xera bien abegosa, y la decisión de facelo y
enfrentase a ello ye precisamente lo que nos quier contar
Toli Morilla, ya que Nueche
d'Insomniu pescancióse como una ferramienta cola que contar
"ónde, cómo, cuando, porqué y cuála ye la
razón que lleva a un autor a poner tol so enfotu en facer visible lo
invisible", asegura'l propiu Toli, ye dicir, intentar amosar el procesu
creativu d'un artista. Pero nun ye solo eso, el cantautor tamién lo
define como una "declaración d'amor polos elementos que definen la
identidá d'una tierra, avérase a los términos de forma
tresparente, ensin usar les señes propies como arma a la escontra
p'afitar diferencies con otres formes de sentir". Too ello "cola sana
intención de romper estructures mentales no tocante a cómo suena
una llingua y qué se diz nella, desfaciéndose de fórmules
y esnalando llibre a la busca d'una identidá propia".



Nos 22 cortes del discu Morilla cola so guitarra, armónica y voz ye'l
principal protagonista, xunta los testos de poetes como Xulio Vixil,
Antón García, Rosa Taurán o'l desapaecíu Manfer de
la Llera. Nel tema musical acompaña a Toli la guitarra de Julio
Gilsánz y los baxos y coros de Sergio Rodríguez, que
tamién fizo les mezcles y producción d'esta Nueche d'Isomniu que
convida a soñar.