L’Espartal, ente la industria y la construcción

La Conseyería d'Ordenación del Territoriu refugó la solicitú de la empresa Zeta Gas p'asitiar una planta d'almacenamientu de gas na redolada de L'Espartal, conceyu de Castrillón. Sicasí, un proyectu pa la construcción de bloques nuevos de viviendes amenaza agora la integridá d'esti llugar declaráu monumentu natural.

Ordenación del Territoriu refugó ayeri oficialmente'l proyectu qu'abanderaba la casa mexicana Zeta Gas, y qu'incluyía seyes depósitos reondos asemeyaos a los que tien Repsol na Campa Torres de xixón con capacidá pa 5.865 metros cúbicos y un gasoductu dende'l muelle de Raíces, arriendes de delles instalaciones suplementaries. La planta que pretendía asitiase procesaría hasta 120.000 tonelaes al añu de gas licuao pa tresformalo en butano y propano, y crearía sobre 50 puestos de trabayu. La Coordinadora Ecoloxista d'Avilés punxere unes alegaciones cntra la mesma alvirtiendo que'l proyectu nun contemplaba delles normatives de seguranza en materia de tratamientu del gas, y que'l riesgu que conllevaba yera grande al tener cerca los depósitos d'acidu sulfúrico d'Asturiana de Zinc, too ello arriendes d'atiestar cola Playa l'Espartal, que tenía una parte ta declarada Monumentu Natural.

Sicasí, agora ye otru proyectu de distintes característiques el qu'amenaza la integridá de L'Espartal, onde'l Conceyu de Castrillón tien prevista una unidá d'actuación que contempla la construcción de cuatro edificios frente por frente col Institutu de Salinas. Según denuncia la Coordinadora Ecoloxista d'Avilés, la faza onde ta prevista l'actuación entra dafechu nel sistema de dunes del Espartal.la Coordinadora apunta qu'amás de presentar sable y vexetación propies d'esti sistema, l'área que se quier construyir entra na zona de servidume de protección de la ribera del mar onde la llei prohíbe cualquier tipu de "edificaciones destinaes a residencia o habitación" mientres que les directrices "Zona de Protección Específica" acuten una faza d'entovía 100 metros más más allá de la Servidume de Protección.

Laempresa Encofrados Tarna ye la que ta tres del proyectu, que contempla cuatro bloques de pisos de cinco plantes. Los vecinos de Salinas opónense tamién al proyectu, y van movilizase pa pidir énte les autoridaes que nun llegalicen esta actuación

La declaración en PORNA como Monumentu Natural del sistema dunar de L'Espartal espeya'l so valor mediuambiental, con presencia d'especies úniques y protexíes por llei, casu de la Crucianella maritima o el Pancratium maritimum.
Más información sobre l'Espartal na web del SIAPA