Les XXXIV Xornaes Internacionales d’Estudiu de l’ALLA van celebrase del 3 al 5 de payares

La presentación del númberu 5 de la revista ‘Ciencies’ y de la edición dixital del ‘Lletres Asturianes 113’ va abrir esta edición, con sede n’Uviéu. El plazu pa matriculase fina esti xueves.

El salón d’actos de la Facultá de Filosofía y Lletres torna a acoyer estos trés díes de ponencies, alderiques y comunicaciones sobre la llingua asturiana que cuenta cola presencia d’espertos procedentes de dientro y fuera d’Asturies. L’entamu ta previstu pal martes a les 16 hores, a lo que va siguir la ponencia ‘Un enfoque polisistémicu a la traducción n’asturianu: normes y estratexes’, a cargu de Cristina Valdés, de la Universidá d’Uviéu y l’Academia de la Llingua Asturiana (ALLA), nomada recién direutora xeneral d’Universidaes y Investigación, y un alderique sobre la mesma.

Pa les 17.45 hores van tener llugar cuatro comunicaciones, a les que van siguir otru alderique: ‘Llectura y valoración del ‘Viaxe del tíu Pachu el sordu a Uviedo’’, de Xuan Xosé Sánchez Vicente; ‘Orixe mineru de guaḥe a traviés de la lliteratura’, d’Armando Murias; ‘Corredores de la memoria. Actualizaciones de la herencia clásica na poesía asturiana d’Aurelio González Ovies’, de Pablo Rodríguez Medina; y ‘La llingua asturiana nel tardofranquismu al traviés de la revista ‘Asturias Semanal’ (1969-1977)’, d’Inaciu Galán. Va zarrar esta primer xornada Laura Martínez Martín, de la Universidade de Lisboa, cola ponencia ‘Otros horizontes: la aparición de la lengua asturiana en las cartas privadas de los emigrantes de principios del XX’.

L’actividá’l miércoles va principiar a les 16 hores con una ponencia nueva, nesta ocasión de Guillermo Lorenzo, de la Universidá d’Uviéu, de nome ‘¿Por qué no en asturiano? El infinitivo flexionado como ‘apomorfía’ negativa de la lengua asturiana’. Darréu van siguir les comunicaciones ‘Aspeutos pragmáticos y entonativos de ‘ho’’, de Carmen Muñiz Chacón; ‘Comunicación institucional y llingua asturiana na era d’Internet: el casu de Xixón’, de Próspero Morán y Rubén Martín-Llames; y ‘Contributo para uma história do asturo-leonês em Portugal’, d’Alberto Gómez Bautista.

Tres una posa, a les 18.15 van continuar les intervenciones con dos ponencies. La primera va tar protagonizada por Teresa Bellido, de la Universitat Jaume I y la Universidá d’Uviéu, sobre’l ‘Estudiu de los niveles d’usu, valoración y actitúes llingüístiques hacia la Llingua Asturiana qu’amuesen los futuros maestros. Implicaciones educatives y curriculares’, mentes que la segunda, ‘Los verbos con prefixu ‘a-’ n’asturianu’, va dala María Olga Álvarez Huerta, de la Universidá d’Uviéu.

Entrada llibre a toles charres

José Virgilio García Trabazo, de la Universidade de Santiago de Compostela, va dar el xueves a les 16 hores la primer ponencia del día caberu de les xornaes, que lleva’l nome de ‘Toponimia prelatina de Asturias: balance y revisión crítica’. Les comunicaciones van principiar a les 17 hores con ‘El pretéritu indefiníu en senabrés-Estudiu de les variaciones xeográfiques’, de Xuan Xosé Lajo; ‘Negación metallingüística y negación oracional: ‘non’ y ‘nun’, de Rosabel San Segundo; y ‘Los glotónimos asturianu, bable, lleonés, mirandés y asturlleonés nos principales diccionarios de les llingües ibériques’, de Nicolás Bartolomé.

Tres el preceptivu alderique y una posa, a les 18.15 hores van encargase de zarrar la trentena cuarta edición de les Xornaes Internacionales d’Estudiu les ponencies ‘Marcadores n’asturianu’, de Roberto González-Quevedo, de la Universidá d’Uviéu y l’ALLA, y ‘Sobre oralidá lliteraria na Edá Media asturiano-lleonesa: una hipótesis interdisciplinaria’, de Rosa María Medina, de la Universidá d’Uviéu.

Les persones que quieran matriculase a les xornaes de l’Academia de la Llingua Asturiana (ALLA) pueden facelo hasta'l xueves na sede de la institución académica, asitiada na uviedina cai L’Águila, númberu 10. Nel casu d’asistencia a toles actividaes, que tienen entrada llibre, van recibir un certificáu acreitativu.