Les Xornaes Lliteraries en Pravia céntrense na tradición y la oralidá

Xosé Ambás, Héctor Braga, Dani García de la Cuesta, Berto Álvarez Peña y Marta López participen nuna cita con una actividá sobre añaes protagonizaes por lletristres asturianes.

Esti martes echen a andar les XIX Xornaes Lliteraries en Pravia baxo'l títulu 'Lliteratura: tradición y oralidá'. Hasta'l domingu hai programaes actividaes dientro de l'amplia programación entamada pola Asociación d'Escritores d'Asturies.

La primera va ser esta tarde la conferencia 'CEDRO: Gestión de los usos secundarios de tus obra' de Pedro Sánchez, anque va desendolcase n'Uviéu (18.30 hores, Club de Prensa Asturiana). Yá de xueves comienza l'actividá en Pravia con un filandón a les 18 hores nel salón de baille de l'asociación de xubilaos empobináu por Xosé Antón Fernández 'Ambás', que va falar de 'Leyendas, cuentos ya cousas de la nuesa tierra'.

El vienres y el sábadu concentren la mayor parte de los eventos, destacando sobre manera una actividá musical sobre les añaes presentada por Berto Varillas. L'espectáculu, programáu pal vienres a les 20.30 hores nel Auditoriu José Barrera, con entrada llibre, ta creáu y coordináu por Ana Silva y pon-y lletra Marta Mori, Pilar Sánchez Vicente, Laura Marcos y la presidenta de l'Asociación d'Escritores d'Asturies, María Esther García López.

Antón García, direutor xeneral de Política Llingüística, va participar na inauguración oficial de les xornaes, el sábadu a les 9.45 hores nel salón d'actos de la Biblioteca de Pravia, nes que la llingua y la tradición van tar presentes al traviés de les temátiques a tratar y el perfil de gran parte de los ponentes.